OpenAI ја повлече новата верзија на ChatGPT – премногу љубезен, премногу досаден

Најновата верзија на популарниот четбот ChatGPT, GPT-4o, беше повлечена од страна на компанијата OpenAI само неколку дена по нејзиното објавување. Причината? Корисниците се пожалија дека четботот е претерано љубезен, ласкав и дури и – досаден.

Софтверот, кој е дизајниран да користи вештачка интелигенција за олеснување на секојдневната комуникација со компјутерите, покажал „претерана учтивост“, па дури и некритичко фалење на корисниците, без разлика на смислата (или бесмисленоста) на нивните барања.

На социјалните мрежи последниве денови се раширија примери од разговори со новиот GPT-4o, во кои четботот ентузијастички поддржува сѐ – од сосема логични до апсурдни прашања, како на пример: „Дали треба да го гушнам кактусот?“

Многу корисници коментираа дека ваквиот однос од страна на четботот е збунувачки, вештачки и понекогаш дури и непријатен. Очигледно, OpenAI се обидел да креира асистент кој секогаш ќе им се допаѓа на корисниците, но овојпат ја преминал границата.

Извори блиски до компанијата наведуваат дека одлуката да се повлече GPT-4o е делумно мотивирана и од анализа која покажала дека комплиментите генерално имаат позитивен ефект врз корисниците – но оваа верзија едноставно претерала.

Извршниот директор на OpenAI, Сем Алтман, преку објава на платформата X (поранешен Twitter), призна дека четботот бил „прељубезен и досаден“. Тој потврди дека верзијата е повлечена и дека веќе се работи на нејзино унапредување.

Во иднина, компанијата планира да воведе повеќе стилови на однесување на четботот, со цел корисниците да можат да изберат комуникациски тон што најмногу им одговара.

ChatGPT, кој за нешто повеќе од две години стана глобален феномен, денес неделно го користат околу 500 милиони активни корисници.

Интернет гигантот Yahoo изрази интерес за купување на интернет пребарувачот Google Chrome, доколку американскиот федерален суд пресуди дека Google мора да го продаде овој дел од своето работење.

Како што пренесува „Блумберг“, директорот на Yahoo, Брајан Провост, на судско рочиште изјавил дека компанијата внимателно ја следи ситуацијата и е подготвена да учествува во купувањето, доколку дојде до продажба. Според проценките, вредноста на Chrome се движи во рамките на десетици милијарди долари.

Yahoo, кој некогаш беше водечки играч на пазарот на интернет пребарување во раните 2000-ти, ја изгуби својата доминација со подемот на Google. Денес, компанијата е во сопственост на Apollo Global Management, откако беше неколкупати препродавана.

Интерес за купување на Chrome покажала и компанијата OpenAI. Минатата недела, нејзиниот менаџер за производи, Ник Тарли, на суд изјавил дека OpenAI би сакала подлабока интеграција со Chrome, со цел создавање на посовремен и покорисен производ. Потсетуваме, ChatGPT веќе има своја екстензија за Chrome.

Американското Министерство за правда го обвинува Google дека го монополизира пазарот и бара компанијата да се раздели со одредени делови од своето работење, меѓу кои е и Chrome, со цел да се поттикне поголема конкуренција.

Google, пак, се спротивставува на оваа идеја, тврдејќи дека ваквата мерка би му наштетила на корисникот, би ја влошила функционалноста на секојдневните дигитални алатки и би го поткопала технолошкото водство на САД.

Дали конечно ќе се случи продажба на еден од најпопуларните интернет прелистувачи, останува да одлучи судот.

Алфабет, матичната компанија на Google, ја започна 2025 со рекордни финансиски резултати и уште посилен стратешки фокус на вештачката интелигенција. Во првиот квартал компанијата не само што ги надмина очекувањата на аналитичарите, туку и постави нови стандарди за тоа како изгледа „AI-доминиран“ технолошки квартал.

Alphabet пријави приход од над $90 милијарди, што претставува раст во однос на истиот период минатата година и повеќе од очекуваните $89 милијарди. Добивката по акција достигна $2.81, додека нето добивката скокна за 46%, на $34.54 милијарди.

Најголем раст беше забележан во: Google Cloud, со приход од $12.26 милијарди (+28% YoY), YouTube, со раст на рекламниот приход до $8.93 милијарди и не помалку важно — висока профитабилност на Google Search, со рекордни $66.89 милијарди приход од рекламирање

Alphabet официјално го нарече Q1 2025 квартал на “AI Infusion” – поради тоа што моделот Gemini 2.5 веќе се користи во 15 различни производи со повеќе од 500 милиони корисници. Дополнително, AI Overviews – новата генерација на пребарување базирана на генеративна интелигенција – сега има над 1.5 милијарди активни корисници месечно.

За првпат во историјата, Alphabet објави исплата на дивиденда во висина од $0.21 по акција, што претставува сериозен сигнал до инвеститорите за финансиска зрелост и стабилност. Воедно, одобрен е и нов откуп на акции во вредност од $70 милијарди, што дополнително ја засилува довербата во долгорочната стратегија на компанијата.

Секако, и оваа деловна слика не е без сенки. Alphabet продолжува да се соочува со антимонополски тужби во САД, ЕУ и Јапонија, главно во однос на практиките на Google Search и Chrome. Потенцијалните исходи вклучуваат присилна продажба на некои делови од бизнисот или ограничувања на вкрстена интеграција меѓу услугите.

Alphabet покажува дека вештачката интелигенција не е само технолошка експериментација, туку реален двигател на раст, профитабилност и трансформација. Со стабилни финансии, дивиденда што ја наградува лојалноста на инвеститорите, и агресивна инвестиција во AI, Alphabet поставува ново ниво за тоа како изгледа технолошкиот 21-ви век.