Американскиот претседател Доналд Трамп синоќа изјави дека, и покрај неодамнешните руски напади, верува оти Владимир Путин навистина сака да стави крај на војната во Украина.

Во интервју за ABC News, Трамп беше директно запрашан дали мисли дека рускиот претседател сака мир – на што одговори:

„Мислам дека сака.“

Тој повторно се наврати на својата улога во односите со Русија, истакнувајќи:

„Да не бев јас, верувам дека Русија ќе ја заземеше цела Украина. Ќе бидам искрен – не ми беше драго кога го видов Путин како лансира ракети кон неколку градови. Тоа навистина не ми се допадна.“

Трамп со овие зборови сака да испрати порака дека без неговото политичко влијание ситуацијата ќе беше уште полоша и дека верува во можноста за преговори и завршување на конфликтот, иако реалноста на теренот говори поинаку.

Зеленски: Русија подготвува нешто во Белорусија, под маската на вежбите

Украинскиот претседател Володимир Зеленски испрати сериозно предупредување – Русија, според него, ова лето планира активности во Белорусија кои изгледаат како воени вежби, но во суштина може да бидат подготовка за нов напад. На самитот во Полска тој изјави:

„Ова лето, Русија подготвува нешто во Белорусија под маската на воени вежби. Вака обично почнуваат новите напади.“

Русија и Белорусија веќе најавија заеднички маневри во септември. Иако Белорусија формално не се вклучи во војната, таа одигра клучна улога на почетокот од инвазијата во 2022 година – дозволи руски трупи да ја минат нејзината територија, давајќи ѝ на Москва директен пристап до Киев. Сепак, тој потенцијал не беше целосно искористен од Кремљ тогаш.

Што сака Путин со прекинот на огнот?

Шефот на кабинетот на Зеленски, Андриј Јермак, во текст за „Гардијан“, анализира зошто Владимир Путин предложи краткотраен прекин на огнот по повод Денот на победата. Според него, ова е обид на Москва да ги убеди западните земји да ги ублажат санкциите – особено оние поврзани со руската авијација.

„На прв поглед, изгледа како Москва да нуди брзо и лесно решение – примирје. Но зад таа слика стои барање за сериозни отстапки, вклучително и укинување на санкции, пред да се разговара за вистински мир“, пишува Јермак.

Тој предупредува дека барањата се обвиткани во хуманитарна и економска обвивка, но суштината е јасна – Русија сака воена и политичка предност. Посебно се фокусира на тоа што Путин сака повторно отворање на воздушниот простор за руската авијација, нешто што моментално е целосно блокирано од страна на ЕУ и САД. Со тоа, според Јермак, Кремљ сака да го спаси своето ослабено воздухопловство.

Јермак: Западот мора да остане цврст

Иако имало сигнали од САД за можност да се разгледа делумно укинување на санкциите за авијација, тие предлози наидоа на силен отпор во Европа. Јермак е дециден – ова не смее да се дозволи.

„Русија очајно се обидува да го спаси својот воздухопловен сектор. Помошта на ова поле мора да биде условена со реални заложби за мир и стабилност, а не со ново пазарење,“ пишува тој.

Јасната порака е: санкциите функционираат, а отстапки без гаранции само би му дале нова енергија на воената машинерија на Кремљ.

„Откако Русија започна неиспровоцирана агресија, украинскиот воздушен простор го преплавија борбени авиони и ракети. Зошто Русите да уживаат слобода на воздушен сообраќај, додека Украинците не се безбедни дури ни во сопствениот дом?“ – прашува Јермак, погодувајќи точно во сржта на проблемот.

Трамп: Путин нема да ја преземе цела Украина

Според поранешниот американски претседател Доналд Трамп, рускиот лидер Владимир Путин нема да успее да ја преземе цела Украина – и тоа, како што тврди Трамп, благодарение на неговото влијание. Во интервју за „ABC“, тој изјави дека амбицијата на Кремљ била целосна окупација на Украина, но оти сега Русија покажува желба за мир.

„Путин ја посакуваше цела Украина. Верувам дека ако не победев на изборите, тој ќе ја добиеше. Убеден сум дека сега е подготвен да ја запре војната. Не ми се допадна тоа што видов – проектилите што ги испрати во неколку украински градови. Тоа беше погрешно, како и целата војна воопшто“, рече Трамп.

Стејт департментот бара конкретни предлози

Од Стејт департментот пристигна јасна порака – доколку Русија и Украина не излезат со конкретни предлози за ставање крај на конфликтот, САД ќе се повлечат од улогата на посредник. Според портпаролката Тами Брус, решението зависи од двете страни, но трпението има граница.

„Како ќе продолжиме понатаму зависи од претседателот. Ако не видиме напредок, ќе се повлечеме од процесот на посредување“, изјави таа.

Зеленски: Безусловен прекин на огнот е првиот чекор

Украинскиот претседател Володимир Зеленски порача дека Русија мора да направи јасни чекори кон завршување на војната, и тоа со безусловен прекин на огнот како прв и неопходен потег.

„Инсистираме на целосно и безусловно примирје како прв чекор. Русија треба да го стори тоа. Наместо да се грижат за своите паради, треба да бидат загрижени што војната се уште трае“, порача Зеленски.

Лавров: Украина ја менува позицијата

Од руската страна, министерот за надворешни работи Сергеј Лавров го отфрли предлогот на Зеленски за итен прекин на огнот. Тој потсети дека претходно рускиот претседател Путин понудил 72-часовно примирје по повод Денот на победата.

„Сега, кога ситуацијата на фронтот не им оди во прилог, украинските власти ја сменија позицијата за 180 степени и почнаа да бараат примирје без предуслови. Ги поминавме веќе тие фази“, изјави Лавров.

На теренот – борбите не стивнуваат

Борбите продолжуваат, особено во Харков и Днепар. Рускиот ПВО-систем соопшти дека во текот на ноќта се уништени неколку украински беспилотни летала, што укажува дека конфликтот сè уште е далеку од завршна фаза.