Apple наводно планира целосно да го премести склопувањето на сите iPhone уреди за американскиот пазар во Индија, во обид да ја намали зависноста од кинеската производствена база, особено поради трговската војна иницирана од администрацијата на Доналд Трамп.

Оваа трансформација, според Financial Times, би можела да започне веќе следната година. Apple, технолошки гигант вреден три трилиони долари, веќе подолго време се соочува со последиците од царинските политики на Трамп. Во еден момент, компанијата беше меѓу најпогодените на пазарот, поради опасноста уредите произведени во Кина да бидат обложени со високи увозни давачки при влез во САД.

Иако Белата куќа подоцна одлучи паметните телефони да бидат изземени од најстрогите царини за кинески производи, Apple и понатаму се соочува со 20% увозен данок на целата стока што доаѓа од Кина – како дел од одговорот на американската влада на улогата на Кина во производството на фентанил.

Процесот на изработка на еден iPhone е исклучително сложен – вклучува повеќе од 1.000 компоненти набавени од целиот свет, иако најголем дел од склопувањето сè уште се врши во Кина. Apple традиционално е дискретен во врска со своите производствени операции, но аналитичарите проценуваат дека околу 90% од сите iPhone уреди се склопуваат токму таму.

Сепак, според Financial Times, компанијата има амбициозен план: до крајот на 2026 година, над 60 милиони iPhone уреди што се продаваат годишно во САД да доаѓаат токму од Индија. За ова ќе биде потребно повеќе од двојно зголемување на производството во таа земја.

Apple веќе работи на проширување на своето присуство во Индија. Сè повеќе уреди склопени таму се насочуваат кон американскиот пазар. Во март, главните индиски партнери на Apple – Foxconn и Tata – испорачале паметни телефони во вредност од речиси 2 милијарди долари на американскиот пазар, обидувајќи се да го ублажат влијанието од потенцијалните нови царини.

Американската економија стагнира во првиот квартал — растот закочен поради увозот и падот на воената потрошувачка

Економската активност во САД стагнирала во првиот квартал од 2025 година, покажуваат најновите податоци на американското Министерство за трговија. Главни причини се зголемениот увоз и намалената државна потрошувачка за одбрана, иако компаниите вложувале повеќе во опрема, а извозот покажал знаци на закрепнување.

Во периодот јануари–март, активноста бележи минимален пад, „помал од 0,1%“ во однос на последниот квартал од 2024 година, кога растот бил 0,6%. На годишно ниво, економијата сепак е во пораст од 2%, но тоа е помалку од растот од 2,5% во последниот квартал од лани.

Според т.н. анулизирана стапка, која ја покажува годишната проекција на БДП базирана на трендот од еден квартал, економската активност е намалена за 0,3%. Тоа е остар контраст со растот од 2,4% во претходниот квартал.

Министерството појаснува дека зголемениот увоз — предизвикан од залихи направени во очекување на нови царини — и намалената владина потрошувачка, посебно за одбрана, го надминале позитивниот ефект од инвестициите во опрема и порастот на извозот.

Увозот е зголемен за рекордни 41,3%, додека воениот буџет паднал за 8%, по раст од 4,8% во претходниот период. Личната потрошувачка исто така ослабнала, со раст од само 1,8% во однос на 4% во претходниот квартал.

Позитивен сигнал доаѓа од компаниите — нивните вложувања во машини се зголемени за 22,2%, што е силно враќање по минус од 8,7% во четвртиот квартал. И извозот е во пораст од 1,8%, откако во претходниот квартал бележеше пад од 0,2%.

Околу 600 севернокорејски војници загинале во Украина – Пјонгјанг ќе им подигне споменик

Околу 600 севернокорејски војници загинале борејќи се на страната на руските сили во војната против Украина, соопшти денеска јужнокорејскиот пратеник и член на парламентарниот комитет за разузнавање, Ли Сеонг-Квен.

„Според досегашните проценки, загубите на севернокорејските трупи изнесуваат околу 4700 лица, од кои 600 се потврдени загинати“, изјави Ли по брифинг со јужнокорејските разузнавачки служби.

Околу 2000 ранети севернокорејски војници биле евакуирани назад во Северна Кореја по воздушен и железнички пат помеѓу јануари и март. Тие се сместени во изолирани објекти во Пјонгјанг и други региони. Според изворите, телата на загинатите се кремирани во Русија, а урните се вратени во татковината.

Поддршка во повторното освојување на Курск

Северна Кореја, според разузнавачките податоци, одиграла клучна улога во повторното заземање на Курската област, со распоредување на околу 18.000 војници во две фази. Од март, кога Москва ја врати контролата врз регионот, бројот на судири опаднал. Иако засега нема индикации за трета фаза на испраќање нови трупи, можноста не е целосно исклучена.

„Шест месеци по нивното вклучување во конфликтот, се проценува дека борбената ефикасност на севернокорејските војници е значително зголемена. Тие се адаптирале, стекнале искуство и покажуваат поголема вештина во користење на модерни системи, како што се беспилотните летала“, рече Ли.

Сепак, долготрајното присуство довело и до одредени проблеми. Се појавиле извештаи за недисциплинирано однесување, вклучувајќи случаи на алкохолизам и кражби.

Самоубиство пред заробување – херои за Пјонгјанг

Јужнокорејските власти веќе претходно соопштија дека на војниците од Северна Кореја им било наредено да извршат самоубиство доколку бидат заробени. Оваа недела, Северна Кореја за првпат официјално призна дека испратила воени сили во Русија за да помогнат во операциите во Курск.

Севернокорејскиот лидер Ким Џонг Ун неодамна ги нарече овие војници „херои што се бореле за правдата“ и најави изградба на споменик во Пјонгјанг во нивна чест.

Рускиот претседател Владимир Путин му се заблагодари на Ким за поддршката и „жртвата на неговите луѓе“. Потсетуваме дека во јуни 2024 година, Русија и Северна Кореја потпишаа договор за стратешко партнерство, кој предвидува меѓусебна воена помош во случај на напад врз која било од двете земји.