Магазин

Колку навистина ќе ве чини реновирањето на бањата?

Повеќето сопственици на станови и куќи го одложуваат реновирањето на бањата се додека не дојде до сериозни дефекти или кога ќе одлучат да го продадат/издадат имотот. Причината лежи во фактот што реновирањето на бањата е тежок и нималку евтин процес. Во продолжение дознајте колку навистина ќе ве чини реновирањето на бањата и кои се работи се вклучени во реновирањето?

Со реновирање ќе ја подобрите функционалноста и естетиката на бањата. Ќе го оптимизирате постоечкиот простор со подобар распоред, ќе ги замените дотраените инсталации, ќе ги отстраните видливите оштетувања и ќе го подобрите изгледот на бањата.

Реновирањето на бањата е добар начин да ја зголемите пазарната вредност на вашиот имот. Имено, ништо не ги одбива потенцијалните купувачи како дотраена, неуредна бања, бидејќи знаат дека поправката ќе бара големи материјални инвестиции. Интересно е да се забележи дека, според експертите, состојбата на бањата има влијание од 5-10% врз вкупната вредност на имотот.

Но, колку ќе ве чини сето ова? Платформата Daibau, каде што се регистриран над 150 компании за реновирање бањи, спроведе истражување меѓу нив за да даде одговор на прашањето што сите ги интересира – колку навистина ќе ве чини да ја реновирате бањата?

Демонтажа на постоечки елементи и плочки

Овој чекор е неопходен за да дојдете до водоводот, но и доколку сакате да ги смените постоечките плочки и да ја замените санитарната опрема – лабавата, тоалетна шолја, туш кабина/када. Ова е идеална можност за замена на кадата со туш кабина и обратно.

Вадењето плочките и санитарија ќе предизвика многу бучава, па ако живеете во зграда, известете ги соседите за работата. Трошоци за демонтирање на мијалници, ормани и слично и носење на депонија чини околу 15 евра по елемент. Отстранување на кадата или тушот и носење на депонија чини 35 евра и отстранување на керамичките плочки и отстранување на шут до депонијата околу 6 евра/м2.

Нови водоводни и електрични инсталации

Една од основните работи при реновирање на бања е замена на дотраен водовод. Само така вашата бања ќе ве служи долги години по реновирањето, без никакви проблеми. Зошто замената на водоводот е толку важна? Бидејќи дефектите предизвикуваат голема материјална штета: поплави кои ги оштетуваат подните облоги, ѕидовите, гниење на мебелот за бања, ширење на мувла. Проблемот со водоводот може да предизвика штета и на вашите соседи ако живеете во стан, како и во соседните соби.

Поставувањето на нови цевки, вентили и сифони се врши по однапред утврден план. Ова е работа која бара вештина, искуство и соодветни алатки, а потребно е да контактирате и водоинсталатер. Преуредување на водоводни инсталации, заедно со материјалот би чинело околу 500 евраза помала бања.

Кога водоинсталатерот ќе ја заврши работата, тогаш доаѓа електричарот кој по потреба треба да ги замени инсталациите за бојлерот, машината за перење, да постави дополнителни штекери или осветлување. Електричарите треба да ги проверат жиците за време на реновирањето на бањата, заради безбедност. Просечни трошоци за електро инсталација се околу 15 евра/м2.

Хидроизолација

Покрај замената на водоводот, хидроизолацијата е една од најважните работи за време на реновирањето на бањата. Хидроизолацијата ја штити бањата од пенетрација на вода низ плочките и ѕидовите. Оваа работа ја вршат или водоинсталатери или керамичари, како што ќе се договорите.

Мајсторите поставуваат хидроизолација на добро подготвена, рамна површина, обично во два слоја, посветувајќи посебно внимание на подните и ѕидните споеви. Поставување хидроизолација во два слоја, со брзосушечка хидроизолациона маса изнесува околу 4 евра/м2, додека изработка на ѕидна хидроизолација со еднокомпонентна маса со брзо сушење изнесува околу 5 евра/м2.

Поставување плочки и белење

На ред доаѓа поставување на плочки, односно керамички работи. Плочки може да залепите само на подот, што е најевтината опција, до половина од ѕидот, што е практично, но донекаде застарен метот и до таванот, што е најскап, но најдобар избор. Бањата со плочки од подот до таванот успешно ќе го издржи тестот на времето и е лесна за одржување.

Можете да изберете плочки со различни големини (плочките со голем формат се актуелни), форма и дизајн, со фуги во иста или различна боја. Доколку имате мала бања, изберете светли плочки бидејќи тие визуелно го зголемуваат просторот и го прават бигорот помалку видлив.

За лепење плочки со стандардни димензии на подготвената подлога мајстор за плочки, за работна рака ќе ви наплати од 10-16 евра/м2. Цената на плочки со среден квалитет, со различни димензии е помеѓу 4 и 12 ЕУР/м2.

Делови од бањата кои не се обложени со плочки, претежно таванот, потребно е да се избелат.

Поставување санитарија

Потоа следува „козметичката“ работа – набавка и монтажа на нова санитарна опрема – туш кабина, када, мијалник, тоалетна шолја. При поставување на санитарната опрема потребно е просторот помеѓу санитарната опрема и ѕидот/подот да се запечати со висококвалитетен силикон, за да се спречи навлегување на вода и појава на мувла.

Монтажа на када ќе ве чини околу 60 евра, приближно колку и туш кабина, монтажа на ВЦ шолја околу 30 евра, мијалник 40-тина евра. Тука е и мебелот за бања – монтажа на ормани за бања чини околу 30 евра.

Бидејќи реновирањето на бањата е процес кој бара ангажман на различни мајстори, договарање термини со сите нив, размислете за реновирање на бањата по принципот „клуч на рака“. Голем број компании за реновирање бањи ја нудат оваа услуга, така што нема да морате да се грижите за координирање на работата на мајсторот или да барате мајстори поединечно. Конкретно, реновирање бања, каде што е вклучена замена на керамика, инсталации и санитарна опрема, се движи околу 600 евра по м2.

Магазин

САД се закани со жестоки мерки поради острата казна на ЕУ за X на Маск

Администрацијата на американскиот претседател Доналд Трамп упати предупредување за можни протумерки кон европските компании поради „дискриминаторни“ мерки против американските услуги.

Во објава на платформата X, Уредот за трговски претставници на САД (USTR) го обвини Европскиот сојуз и некои членки за „дискриминаторни и проблематични тужби, даноци, казни и директиви против американските услуги“. Во исто време, USTR посочи дека европските компании како Accenture, DHL, Siemens и Spotify „слободно работат“ во САД.

„Ако ЕУ и земјите членки инсистираат на продолжување со ограничувањата и дискриминирачките мерки, САД нема да имаат друг избор освен да користат сите расположливи алатки за да се спротивстават на овие неправедни мерки“, се наведува во соопштението.

Ова следува по казната од 120 милиони евра што Европската комисија ја изрече на платформата X на Елон Маск за кршење на правилата за транспарентност според Актот за дигитални услуги. По казната, X го укина акаунтот за реклами на Европската комисија, а Маск спореди ја Унијата со нацистичка Германија.

ЕУ нагласи дека казната е изречена поради обесхрабрување на корисниците, оневозможување на истражувачите да дојдат до податоци и недостаток на транспарентност во документацијата за реклами. Трамп претходно ја критикуваше казната, велејќи дека „Европа се движи во погрешен правец“.

Магазин

Влад Илиќ од Куманово: Најдобар стенд ап комичар во Велика Британија за 2025

Во „бастионот“ на светската комедија, култниот Comedy Store во Лондон, македонското знаме симболично се развеа на највисокото скалило. Во конкуренција на дури 700 комичари од целото Обединето Кралство, на 3 декември 2025 година, Македонецот Влад Илиќ ја понесе престижната титула „Најдобар стенд-ап комичар во Велика Британија за 2025“.

По првиот голем блесок на ББС пред три години, овој успех е круна на една десетгодишна фасцинантна транзиција. Патот на Илиќ започна како актер во Кумановскиот театар, каде што под влијание на домашните мајстори како Сашко Коцев и Тони Михајловски, почна да го бруси својот талент за подоцна да се лансира меѓу светските ѕвезди.

„Среќен сум што годините поминати на сцена се крунисани со ова признание. Тоа е потврда за сиот влог, но најмногу за хуморот кој е специфичен и веќе препознаен. Она што ме издвојува е нашиот менталитет – тој уникатен македонски ген кој ни овозможува на животот да гледаме малку понесериозно и пообјективно. Можеби во фудбал секогаш ќе губиме од Англичаните, ама во хуморот не ни можат ништо!“, вели расположениот Илиќ веднаш по триумфот.

Зад блескавиот пехар стојат илјадници непроспиени ноќи, аматерски настапи во зачадени клубови и неуморно пишување материјали. Влад денес е вистински полиглот на сцената, изведувајќи ги своите шоуа на четири јазици: македонски, англиски, српски и италијански.

„Ништо не е случајно во ваков натпревар,“ објаснува тој. „Ме грее љубовта кон професијата, поддршката од семејството и гордоста што ја претставувам мојата татковина. Тој пламен е посилен од студот на овој дождлив остров.“

Покрај статуетката, Илиќ доби и парична награда од 10.000 фунти. На прашањето каде ќе завршат средствата, тој во свој препознатлив стил одговори: „Ќе ги дадам во хуманитарни цели – на братучедите.“

Магазин

Конструирање и одржливост: како Samsung Galaxy S и Z сериите предничат во оваа област

Немаме резервна планета – нашата земја и вода мора да останат чисти и просперитетни за идните генерации. Одржливоста не е избор, туку обврска. Samsung ја разбира оваа одговорност и затоа ги создаде сериите Galaxy S и Galaxy Z, кои го застапуваат овој принцип. Овие врвни паметни телефони се повеќе од најсовремени уреди; тие се доказ за развој на технологија што ја почитува нашата планета. Ајде да погледнеме како Samsung ја комбинира извонредноста во конструирањето со одржливоста во своите Galaxy S и Z серии.

Galaxy Z серијата: Иновации со еколошко срце

Моделите Galaxy Z Fold7 и Flip7 се доказ за целосната посветеност на Samsung кон одржливостa без компромис во перформансите. Еве како овие уреди се конструирани за да бидат и моќни и еколошки прифатливи:

Рециклирани материјали: Fold7 и Flip7 содржат девет рециклирани материјали, меѓу кои пластика, стакло, алуминиум, кобалт, ретки природни елементи, злато, бакар, челик и литиум. Овој пристап го намалува еколошкото влијание од производството, а истовремено го задржува врвниот квалитет.

100% рециклиран кобалт и литиум: Батериите кај моделите Fold7 и Flip7 користат 100% рециклиран кобалт и литиум, што значително го намалува еколошкиот отпечаток.

Одржлива амбалажа: Амбалажата за овие уреди е изработена од 100% рециклирана хартија, со што се елиминира потребата од пластика за еднократна употреба и се поттикнува поодржливо искуство при пакување.

Slim Actuator технологија: Slim Actuator кај моделот Fold7 овозможува камера со високи перформанси во потенок форм-фактор, гарантирајќи дека иновациите не доаѓаат на сметка на дизајнот.

Ултра-високoгустинска печатена плоча: Во моделот Flip7 се вградени компоненти со висока густина, со што максимално се искористува внатрешниот простор и се намалува отпадот од материјали.

Компактен модул на камерата: Модулот на камерата кај Flip7 е унапреден за да биде помал, а притоа да ги задржи врвните перформанси, што ја потврдува способноста на Samsung да воведува иновации на одржлив начин.

Систем со двојна батерија: Системот со двојна батерија кај Flip7 нуди зголемување од 300 mAh во споредба со претходната генерација, подобрувајќи ги перформансите, а истовремено задржувајќи компактен дизајн.

Galaxy S серијата: моќ во комбинација со цел

Серијата Galaxy S25 ја продолжува традицијата на Samsung да ги спојува најсовремените технологии со одржливите практики. Еве како серијата S25 е конструирана за да биде и моќна и еколошки прифатлива за нашата планета:

Прилагоден Snapdragon® 8 Elite чипсет: Samsung, во соработка со Qualcomm, го унапреди Snapdragon® 8 Elite чипсетот, што резултира со подобрен квалитет на екранот, поголема ефикасност и подобрени перформанси на камерата – дури и во услови на слаба осветленост.

Рециклирани материјали: Серијата Galaxy S25 содржи рециклирани материјали, меѓу кои пластика, стакло, алуминиум, кобалт, ретки природни елементи, злато, бакар и челик, со што се придонесува за поодржлив животен циклус на производите.

Циркуларен синџир на снабдување со батерии: Серијата Galaxy S25 користи рециклиран кобалт од претходно користени Galaxy уреди или од батерии отфрлени за време на производството, со што се подобрува циркуларноста и се намалува електронскиот отпад.

Користење обновлива енергија: Samsung премина на 100% обновлива енергија во осум од десет фабрики за производство на мобилни уреди, вклучително и оние во кои се развиваат компонентите за серијата Galaxy S25.

Намалување на јаглеродниот отпечаток: Моделот Galaxy S25 Ultra емитува вкупно 48,9 kg CO₂ во текот на целиот свој животен век, според пресметките направени преку системот за процена на животниот циклус на производите на Samsung.

Зошто е ова важно?

Суштината на пристапот на Samsung кон конструирањето и одржливоста не лежи само во исполнување на потребите на денешницата, туку и во обликување подобро утре. Со користење рециклирани материјали, оптимизирање на потрошувачката на енергија и намалување на јаглеродниот отпечаток, Samsung гарантира дека уредите од сериите Galaxy S и Galaxy Z не се само моќни, туку и одговорни.

Без разлика дали го истражувате иновативниот дизајн на склопливите уреди од Z серијата или модерната елеганција на S серијата, едно е јасно: Samsung е лидер во создавање технологија што е подеднакво одржлива и напредна.

Во последниот текст од оваа серија ќе се осврнеме на третиот темел на гаранцијата за квалитет на сериите Galaxy S и Z.