Свет

[ФОТО] Снајперисти од хеликоптер убиваат коали во Австралија, досега убиени над 700 единки

Контроверзен отстрел на коали од хеликоптери по пожарите во Австралија: Активистите реагираат

По катастрофалните шумски пожари во Австралија, стотици коали биле убиени од снајперисти од хеликоптери во рамки на контролирана акција за отстрел на диви животни, со цел да се спречи нивното страдање од глад и повреди. Акцијата, која се спроведуваше над подрачјето на Националниот парк Будџ Бим, предизвика жестоки реакции од активистите за заштита на животните.

Според напис на британскиот Independent, пожарите уништиле илјадници хектари шума, оставајќи многу коали изгорени, жедни и гладни. Австралиските власти одлучиле да интервенираат преку масовна еутаназија, за која велат дека е хуман начин да се ублажат страдањата на преживеаните животни.

Сепак, методата на отстрел од воздух, со хеликоптери, наиде на жестока критика од страна на организациите за заштита на животни. Според нив, досега се убиени над 700 коали, а постои загриженост дека бројката ќе продолжи да расте.

Претседателката на организацијата Koala Alliance, Џес Робертсон, изјави дека локалните заедници се шокирани од начинот на кој се извршува отстрелот.

„Никој не може со сигурност, од хеликоптер, да процени во каква здравствена состојба се коалите. Тоа е апсолутно нечовечно“, истакна таа.

На нивниот официјален Фејсбук профил, организацијата објави фотографии од хеликоптери кои кружат над опожарените шуми. Од Koala Alliance потенцираат дека не се против хуманата еутаназија, но се категорично против, како што велат, систематското и брутално убивање на животни.

„Овие коали дојдоа од плантажа со еукалиптус, која неодамна беше расчистена во близина на националниот парк. Се уште се пука таму. Ако во коалите се пука додека се на дрвјата, тоа значи дека многу младенчиња се оставени сами да страдаат и умираат. Тоа е нечовечно и одвратно“, велат од организацијата.

Дополнително, тие посочуваат дека пожарот во Националниот парк не се случил случајно.

„Ова е последица на децении лошо управување со природните ресурси. Никој не може со сигурност да каже како започнал пожарот, но тајмингот и блиската жетва на плантажите предизвикуваат сериозна загриженост“, стои во нивната објава.

Активистите бараат итен прекин на ваквите методи и повикуваат на транспарентност и алтернативни решенија што ќе го почитуваат животот на овие уникатни животински видови.

Свет

Русија распореди нуклеарно способна ракета „Орешник“ во Белорусија

Белорускиот претседател Александар Лукашенко соопшти дека новоразвиената руска хиперсонична ракета со нуклеарен капацитет, позната како „Орешник“, е веќе распоредена на територијата на Белорусија и е ставена во борбена готовност.

Во своето годишно обраќање, Лукашенко изјави дека ракетниот систем е присутен во земјата од претходниот ден и дека веќе извршува борбена задача. Станува збор за оружје кое Русија го претстави минатата година, откако беше употребено при напад врз украинскиот град Днипро, што тогаш беше оценето како сериозна ескалација на конфликтот во Украина, кој се приближува кон четвртата година.

Москва уште во 2023 година распореди тактичко нуклеарно оружје во Белорусија и најави дека до крајот на 2025 година може да го стационира и системот „Орешник“. Белорусија, како близок сојузник на Русија, има значајна улога во воената стратегија на Москва, која ја користеше белоруската територија за почетокот на офанзивата против Украина во февруари 2022 година.

Во август, властите во Минск најавија дека ќе се вежба распоредување на ракетите „Орешник“ за време на заедничките воени вежби „Запад-2025“, кои ќе се одржат во близина на источните граници на Европската унија и НАТО.

Свет

Карлсон тврди: Можно е Трамп вечерва да најави воен судир со Венецуела

Американскиот новинар Такер Карлсон изјави дека постои можност американскиот претседател Доналд Трамп вечерва да ѝ објави војна на Венецуела, повикувајќи се на информации добиени од член на американскиот Конгрес.

Во подкастот „Sudging Freedom“, Карлсон рече дека на конгресмени им било соопштено дека војната е „неизбежна“ и дека наводно би можела да биде објавена во вечерашното обраќање на претседателот за состојбата на нацијата, закажано за 21 часот по источно време.

„На членовите на Конгресот вчера им беше кажано дека војната е неизбежна и дека ќе биде објавена вечерва во 9 часот. Кој знае дали тоа навистина ќе се случи. Не знам и не сакам да претерувам со информации кои и самиот ги имам во ограничена мера. Но, еден член на Конгресот ми го кажа ова утрово“, изјави Карлсон.

Во меѓувреме, САД се подготвуваат за обраќањето на претседателот Трамп до нацијата, кое привлекува големо внимание поради шпекулациите за можни крупни надворешнополитички најави.

Свет

Москва најавува тужби против европски банки поради замрзнатите средства

Централната банка на Русија најави дека ќе покрене судски постапки против европски банки во руски арбитражен суд, барајќи надомест за, како што наведува, нелегалното блокирање и обидите за користење на нејзините замрзнати средства.

Во соопштението на регулаторот се истакнува дека Банката на Русија ќе бара обештетување за целосниот износ на замрзнатите средства, како и за изгубениот приход што произлегол од нивното блокирање. Овој чекор, според институцијата, е дел од пошироката стратегија за заштита на нејзините финансиски интереси.

Најголемиот дел од руските средства што се под санкции се наоѓаат на сметките на белгискиот депозитар Euroclear. Според финансиските извештаи, вкупната вредност на средствата на Euroclear Bank на крајот на септември изнесувала 227 милијарди евра, од кои 193 милијарди евра се поврзани со санкционирани руски средства.

Руската централна банка веќе поднела тужба против Euroclear во московскиот арбитражен суд, обвинувајќи ја институцијата за „нелегални дејствија“ и оспорувајќи ги плановите на Европската Унија за користење на замрзнатите руски средства. Во тужбата се бара исплата од 18,1 билиони рубљи, односно околу 192,2 милијарди евра.

Според дипломатски извори во Брисел, околу 18 милијарди евра од замрзнатите средства се чуваат на сметки во неколку француски приватни банки. Дополнителни износи се депонирани и во германски банки, како и на сметки во Шведска, Кипар и Луксембург.

Весникот Фајненшл тајмс, повикувајќи се на неименувани извори, објави дека околу седум милијарди евра од руските средства се наоѓаат и во приватни банки во Белгија.