Македонија

По три години, од 3 мај летови Скопје – Барселона, стартува и авиолинијата за Лион

Од Скопје до Барселона и Лион – нови летови од 3 мај

Од 3 мај Меѓународниот аеродром Скопје воспоставува нови директни авионски линии до Барселона и Лион, во соработка со авиокомпанијата „Виз Ер“ и со финансиска поддршка од Владата. Ова беше официјално потврдено денеска на заедничка прес-конференција на ТАВ Македонија и „Виз Ер“.

Линијата Скопје – Барселона ќе се одвива двапати неделно, секој вторник и сабота, додека летовите до Лион се закажани трипати неделно – во вторник, четврток и сабота. Првиот лет за Барселона е најавен за сабота, во 18:50 часот, а како дел од промотивната кампања, двајца патници ќе добијат бесплатни авионски билети преку избор на социјалните мрежи.

„По пауза од три години, повторно ја поврзуваме Скопје со Барселона. Враќањето на оваа линија е резултат на заедничка визија и силна посветеност од страна на Владата и нашиот партнер ‘Виз Ер’“, изјави генералниот директор на ТАВ Македонија, Неџат Курт. Тој додаде дека очекува оваа рута да биде уште попопуларна отколку што беше во минатото.

Особено значајно е тоа што Лион, град заштитен од УНЕСКО и познат како родно место на кинематографијата, за првпат ќе биде поврзан со Скопје со директна авионска линија. Курт нагласи дека Лион, со својата богата култура и гастрономија, има потенцијал да привлече голем број патници.

Покрај овие нови линии, ТАВ најавува и планови за воспоставување летови до шпанското и италијанското крајбрежје, враќање на рутата кон Ларнака (Кипар), како и отворање нови дестинации кон Прага и Мадрид.

Летот кон Дубаи, кој требаше да започне со „Флајдубаи“ на крајот од март, е одложен за есен. Сепак, според раководството на ТАВ, најавеното олеснување на визниот режим од страна на Владата ќе има позитивно влијание врз интересот за оваа линија и бројот на патници.

Македонија

Владата донесе одлука за прогласување на кризна состојба на целата територија на Македонија

Владата на денешната редовна 138 владина седница, на предлог на Управувачкиот комитет за координација и управување со системот за управување со кризи донесе одлука за постоење на кризна состојба во снабдувањето со електричната енергија на целата територија на државата во рок од 7 дена од денот на влегување во сила на оваа одлука.

Како што информиравме во текот на претходните денови, оваа одлука произлегува поради неможноста за набавка на мазут кој е неопходен во делот на производството.

Задолжителните резерви на нафтен дериват ќе се отстапат без надоместок, а АД ЕСМ за трошењето на нафтениот дериват мазут има обврска да доставува извештај со Владата и до Министерство за финансии.

Македонија

Отворена за сообраќај клучката кај Подмоље на автопатот Охрид–Кичево

Сообраќајниот крак – клучката на автопатската делница Охрид–Кичево, кај селото Подмоље, е пуштен во редовен сообраќај, информираат од СВР Охрид. Со ова се нормализира сообраќајот на повеќе фреквентни правци, меѓу кои Охрид–Кичево–Скопје, Охрид–Струга, Струга–Кичево–Скопје и Струга–Охрид, без какви било дополнителни ограничувања.

Од полицијата нагласуваат дека клучката е целосно функционална и апелираат до сите учесници во сообраќајот да возат внимателно и одговорно. Возачите на патнички и други моторни возила се повикуваат строго да ги почитуваат сообраќајните правила и прописи, како и поставената хоризонтална и вертикална сигнализација, со цел да се зголеми безбедноста на патиштата и да се избегнат несакани инциденти.

Македонија

Јаневска: Загадениот воздух нема да донесе предвремен зимски распуст

Министерката за образование, Весна Јаневска, денеска увери дека учениците ќе продолжат со настава до крајот на месецов и потоа ќе заминат на редовниот зимски распуст, без предвремено распуштање поради загадениот воздух.

„Остануваат уште малку денови до распустот и во овој момент немаме информации дека здравјето на децата е загрозено“, истакна Јаневска одговарајќи на новинарско прашање при посетата на Економскиот факултет на УКИМ. Таа додаде дека отсуствувањето ден-два поради здравствени причини не е проблем, но дека мора да се избегне негативната практика од минатото, кога се скратувале учебните денови поради различни причини.

„Жалам што морам да направам груба споредба, но во некои европски земји децата одат на настава дури и кога имаат грип, се додека нивното здравје не е сериозно загрозено. Нашите ученици не се пренатрупани со учење, и доколку нема сериозен здравствен ризик, не е проблем да отсуствуваат еден-два дена. Проблем беше кога се скратуваа учебните денови заради поевтини одмори или подготовки за писмени испити. Тие негативни појави треба да ги отстрануваме“, нагласи министерката.

Јаневска потенцираше дека одлуките секогаш ќе бидат носени во интерес на здравјето на децата, а во овој момент нема сигнал дека наставата е во опасност по нивното здравје.