Свет

Трамп со својата најнова изјава за Зеленски го изненади светот: Овој потег може веднаш да ја заврши војната во Украина

Мистериозен договор на повидок: Трамп тврди дека Зеленски е подготвен да го отстапи Крим на Русија?

Американскиот претседател Доналд Трамп изјави дека верува оти неговиот украински колега Володимир Зеленски е подготвен да го отстапи Крим на Русија како дел од потенцијален мировен договор, и покрај досегашните цврсти одбивања од страна на Киев да се разговара за територијални отстапки.

Како што пренесува BBC, Трамп на прашањето дали мисли дека украинскиот претседател е подготвен да ја предаде контролата над Крим — кој Русија го анектираше во 2014 година — одговорил потврдно: „Мислам дека е подготвен.“

Тој ја искористи приликата и да го повика рускиот претседател Владимир Путин да „престане со нападите, седне и потпише договор“, додавајќи дека прекин на огнот може да се постигне за само две недели.

Краток состанок со долгорочни импликации

Коментарите на Трамп следеа по неговиот повраток од Ватикан, каде што имал кратка средба со Зеленски зад затворени врати, пред погребот на папата Франциско. Како што изјави американскиот претседател, разговорот „поминал добро“, а за Крим, како што рече, се дискутирало „многу кратко“.

Интересно, Трамп додаде дека Зеленски сега делува „посмирено“, навестувајќи промена на неговиот став од претходната средба во Белата куќа, која беше исполнета со тензии.

Од украинска страна, официјалната позиција останува непроменета — Киев постојано одбива било какви територијални компромиси и инсистира дека евентуални разговори за територии може да се одржат само по целосен прекин на огнот. Ниту Зеленски, ниту Путин сè уште не одговориле јавно на најновите изјави на Трамп.

Притисок за мировен договор

Американскиот портал The Hill наведува дека Трамп е разочаран од неодамнешните руски напади врз Киев, во кои загинале најмалку девет лица, а над 70 биле повредени, меѓу нив и шест деца. Тој остро ја осудил Русија, истакнувајќи дека е „изненаден и длабоко разочаран“ што нападите се случиле веднаш по разговорите за мир.

САД, според извештаите, вршат интензивен притисок врз двете страни да постигнат договор, но предупредуваат дека ако не се постигне напредок, Вашингтон би можел да се повлече од улогата на посредник.

Иако деталите од евентуалниот мировен договор не се објавени, шпекулациите укажуваат дека САД би можеле да предложат официјално признавање на Крим како дел од Руската Федерација — предлог што Зеленски досега категорично го отфрлал.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.