Вицепремиерот во Владата на Србија денеска ја отфрли идејата за вонредни парламентарни избори откако доцна синоќа студентите во блокада објавија за првпат дека бараат распуштање на Народното собрание. Ивица Дачиќ, кој е и министер за внатрешни работи на Србија, изјави утрово дека Владата има стабилно парламентарно мнозинство и дека таквите барања на студентите би можеле да значат „крај на нивниот сон“. 

„На Србија и е потребна политичка стабилност и континуиран економски развој. Според мене, нема причина за никакви вонредни парламентарни избори. Владата има стабилно парламентарно мнозинство“, изјави тој.

Дачиќ додаде дека не е поддржувач на никакви вонредни избори, туку само на редовни.
„Никогаш не го криев тоа, не затоа што се плашам од резултатите. Не мислам ни дека разбираат дека ова би можело да биде крај на нивниот сон“, рече Дачиќ.

Студентите во блокада во Белград синоќа објавија дека бараат предвремени парламентарни избори.
„Бараме итно распуштање на Народното собрание и распишување вонредни парламентарни избори во согласност со член 109 од Уставот на Република Србија“, објавија тие на социјалната мрежа X. Веруваат дека демократијата е единствениот правилен излез од кризата.
„Ги повикуваме луѓето да ја поддржат листата на која студентите во блокадата на сите високообразовни институции на територијата на Србија ќе ја пренесат својата доверба, за да победи вистината на вагата на правдата“.
Тие, исто така, истакнаа дека корените на корупцијата во владата навлегле премногу длабоко во државните институции, на кои им е спречено независно да ги извршуваат своите должности.

Во изјава за белградски медиуми, студентка од Факултетот за политички науки нагласи дека – студентите нема да се кандидираат за функции.
„Знаеме колку е одговорноста да се биде на такви позиции, но луѓето што моментално се на власт очигледно не разбираат, и затоа ќе поддржиме луѓе кои ги сметаме за кредибилни и за кои мислиме дека правилно ќе го претставуваат гласот на народот, изјави Софија Периќ, студентка на Факултетот за политички науки.

Таа во изјава за Нова С, истакна дека студентите ги искажале своите барања пред пет месеци, кога се обратиле до институциите за да функционира системот, но по толку време е јасно дека владата нема да ги исполни барањата на студентите.
„Смена на владата е предуслов за исполнување на нашите барања, а владата може да ја потврди својата легитимност на изборите, ако верува дека таа постои во ова општество“, рече Софија Периќ.
Кога станува збор за опозицијата, Периќ рече дека студентите се уште не одлучиле кој ќе биде на списокот и објасни дека студентите се уште не сакаат да ги откријат конкретните имиња и професии на луѓето што ќе ги поддржат.

Дел од српската опозиција веќе се објави за поддршка на студентското барање за распишување вонредни парламентарни избори. 

Еколошкото востание го поддржа барањето на студентите за вонредни парламентарни избори и ги повика сите еколошки организации и граѓани да ги поддржат студентите. Во соопштение се наведува дека поддржуваат одржување вонредни избори „поради неподносливата социјална криза, распаднатите институции и децениското уништување на се што е здраво во земјата“, како и заради идните генерации.

Барањето за распишување на изборите и одлуката на студентите во блокада да учествуваат во нив е одлична вест за целата либертаријанска Србија која сонува за ослободување од тиранијата на Вучиќ, изјави денеска претседателот на Новото лице на Србија, пратеникот Милош Парандиловиќ. Како што истакна во соопштение, студентите ги разбудија луѓето низ целата земја и нема сомнение дека нивното учество на изборите ќе го даде потребниот импулс за победа над Вучиќ.
„Во Србија можете да го почувствувате мирисот на слободата, што се приближува секој ден, а тој процес е незапирлив“, смета Парандиловиќ.

Демократската партија (ДС) денеска го поддржа барањето на студентите за распишување вонредни парламентарни избори и истакна дека го почитува фактот дека студентите во моментов се поддржани од две третини од граѓаните на Србија, иако постојано нагласуваат дека нема услови за фер и чесни избори во Србија. Животодавната енергија, инспирирана од храбрата, упорна и паметна борба за слобода и правда, што младите ја разбудија кај граѓаните на Србија, му дава целосен легитимитет на ова нивно барање, се наведува во соопштението на Демократската партија.Демократската партија истакнува дека стои на својот став, што е повторен неколкупати претходно, дека е подготвена да ја обезбеди целата потребна помош на универзитетската студентска листа на тие избори, без да настапува ниту самостојно, ниту како коалициска листа.

Социјалдемократската партија (СДС) го поддржа барањето на студентите за одржување вонредни парламентарни избори, наведувајќи дека тоа е единствениот излез од длабоката политичка и социјална криза во која се наоѓа Србија веќе половина година. Студентите покренаа протести во Србија во последните месеци како одговор на длабоката неправда и ја мобилизираа енергијата на граѓаните, барајќи правда и почитување на законот, но режимот, наместо да ги исполни барањата на студентите, продолжи со репресија, насилство и брутална пропаганда, се наведува во соопштението на СДС.

Саво Манојловиќ, лидерот на движењето „Крени-промени“, денеска го поддржа барањето на студентите за вонредни парламентарни избори, нагласувајќи дека студентите станале клучни иницијатори на општествените промени и дека воспоставиле единствена организациска маса, што претходните опозициски партиски структури не биле во можност да ја постигнат.

Во речиси ист момент и Универзитетот во Белград апелира до државните власти да создадат услови за продолжување на учебната година, чие редовно завршување е сериозно загрозено, преку дијалог со студентите и исполнување на нивните барања, се нагласува во Платформата за дискусија на високообразовната институција со надлежните органи и институции.Таа Платформа беше презентирана и на средбата што делегацијата на Универзитетот во Белград, предводена од ректорот Владан Ѓокиќ, ја имаше со премиерот Ѓуро Мацут на 30 април.
„Ректорот и деканите немаат мандат од студентите да преговараат за исполнување на студентските барања, ниту за прекин и модификација на блокадата. Универзитетот во Белград ги поддржува првичните студентски барања, но не учествува во организацијата на блокадите, ниту може да ги спречи“, се вели во Платформата потпишана од Владан Ѓокиќ и 31 декан.
Се додава дека Универзитетот и факултетите ја констатирале фактичката состојба создадена со одлуката на студентските пленуми и воедно ги поддржале студентските барања и правото на студентите на мирен протест, собирање и изразување на мислење.
Во својата платформа, Универзитетот во Белград постави прашања и до Владата на Србија и до Министерството за образование, а првото во низата е дали и кога е планирано да се започне дијалог со студентите кои ги блокираат факултетите за исполнување на нивните барања, со цел да се овозможи продолжување на учебната година. 

Европскиот парламент ќе го разгледа денеска извештајот за Србија, а попладнево известителот на ЕП за Србија, Тонино Пицула, ќе одржи прес-конференција.

Во нацрт-извештајот за Србија за 2023 и 2024 системските проблеми нагласени од студентските протести низ цела Србија се наведени како особено загрижувачки.