Свет

САБОТАЖА БЛИЗУ МОСКВА ДЕН ПРЕД ГОЛЕМАТА ПАРАДА Партизанско движење уништи трафостаница во селото Могилци?

Тврдењата за нападот на трафостаница доаѓаат во време кога украинскиот претседател Володимир Зеленски најави дека Украина не може да ја гарантира безбедноста на странските претставници кои ќе присуствуваат на парадата на Денот на победата. Москва и Киев ги продолжија меѓусебните напади и покрај предложеното тридневно примирје.

Партизанското движење „Атеш“ објави дека извршило саботажа во близина на Москва, во пресрет на Денот на победата. Групата тврди дека уништила опрема во трафостаница во селото Могилци, што довело до прекин на комуникациите на неколку руски воени единици.

Селото Могилци се наоѓа околу 45 километри североисточно од Москва, каде што утре, на 9 мај, треба да се одржи воената парада на Црвениот плоштад.

Според објавата на „Атеш“ на Телеграм, саботажата резултирала со прекин на комуникациите во неколку важни воени објекти, вклучувајќи го 629-тиот полк за ракетна одбрана (воена единица 51857), 21-та Специјална оперативна бригада (воена единица 3641), како и воениот град каде што се наоѓаат воените единици 20007, 03523 и 51084.

Меѓутоа, овие тврдења не можат независно да се потврдат.

Движењето „Атеш“, составено од Украинци и Кримски Татари, е познато по своите саботажни акции на териториите под руска контрола и во самата Русија. Според информации од Википедија, движењето е активно од 2022 година и има извршено бројни акции, вклучувајќи саботажи на железнички линии и напади врз руски воени објекти.

Украинскиот претседател Володимир Зеленски на 3 мај изјави дека Украина не може да ја гарантира безбедноста на странските претставници кои ќе присуствуваат на руската воена парада во Москва. Тој истакна дека безбедноста на територијата на Русија е одговорност на самата Русија и дека Украина нема да даде никакви гаранции, бидејќи не знае што Русија може да направи во тие денови.

Дополнително, вчера украинската војска изврши напади со беспилотни летала на руска територија, што доведе до затворање на аеродромите во Москва и откажување или пренасочување на бројни летови. Ова се случи во време кога светските претставници пристигнуваат во руската престолнина за да присуствуваат на прославите.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.