Балкан

Социјалистичката партија на премиерот Еди Рама четврти пат по ред победи на парламентарните избори во Албанија

Тирана – Социјалистичката партија (СП) предводена од актуелниот премиер Еди Рама, забележа убедлива победа на парламентарните избори во Албанија, освојувајќи 52,08 проценти од гласовите. Со овој резултат, партијата обезбеди апсолутно мнозинство во парламентот од 140 пратеници, објави албанската изборна комисија откако беа преброени 95 отсто од гласачките места.

Со овој изборен резултат, се смета за речиси извесно дека Рама ќе остане на чело на владата, продолжувајќи го својот мандат што започна во 2013 година.

Втора политичка сила останува опозициската, конзервативна Демократска партија (ДП) под водство на политичкиот ветеран и поранешен претседател Сали Бериша, која освои 34,47 проценти од гласовите.

Покрај двете најголеми партии, уште шест помали политички субјекти најверојатно ќе добијат претставници во парламентот, иако ниту една од овие партии не освои повеќе од четири отсто од гласовите. Според изборниот закон, прагот за влез во албанскиот парламент изнесува еден процент за индивидуални партии и пет проценти за коалиции.

Патот кон ЕУ

Албанија, која е членка на НАТО од 2009 година, од 2022 води преговори за приклучување кон Европската Унија. Во тој контекст, меѓународните набљудувачи забележале одреден напредок, особено во борбата против корупцијата.

Сепак, изборниот процес не помина без забелешки. Според извештаите на Организацијата за европска безбедност и соработка (ОБСЕ), изборната кампања била засенета од обвинувања за несоодветен притисок, заплашување и злоупотреба на државни ресурси. И покрај тоа, ОБСЕ оцени дека самиот ден на гласање бил спроведен на коректен начин, со присуство на нивни набљудувачи на теренот.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.