Магазин

Тест од 30 секунди кој открива дали сте во животна опасност

Ромберговиот тест – едноставен, но значаен показател за рамнотежата и невролошката функција

Ромберговиот тест претставува едноставна, но клинички важна невролошка проценка која се користи за проверка на рамнотежата и функционалноста на проприоцептивниот систем – дел од нервниот систем кој му овозможува на телото да ја чувствува својата положба и движење без визуелна контрола. Овој тест најчесто се применува кај лица со нарушена стабилност, но може да се користи и за проценка на трезвеноста, што често го гледаме и во филмската индустрија.

Како се изведува тестот?

Испитуваниот стои исправено, бос, со споени стапала и рацете покрај телото. Во првата фаза стои со отворени очи околу 30 секунди. Потоа ги затвора очите и се обидува да ја одржи рамнотежата уште 30 секунди.

Во некои случаи, лекарот може да побара дополнителни задачи, како стоење на една нога или одење во права линија така што петата ги допира прстите на другата нога. Тестот се изведува без никаква физичка поддршка – потпирање на ѕид или друг предмет не е дозволено.

Што покажуваат резултатите?

Позитивен резултат се забележува ако лицето ја губи рамнотежата при затворање на очите. Ова може да укаже на проблеми во проприоцептивниот, вестибуларниот или сензорниот систем. Можни причини се:

интоксикација со алкохол или психоактивни супстанции

дефицит на витамин Б12 или железо

метаболички нарушувања (како дијабетес или срцеви болести)

невролошки заболувања (Паркинсонова болест, синдром на Верников, Фридрихова атаксија, Мениеров синдром)

повреди на главата

Негативен резултат укажува на зачувана рамнотежа и нормална функција на сензомоторниот систем.

Ромберговиот тест, иако едноставен за изведување, нуди вредна клиничка информација и често претставува прв чекор во подетално невролошко испитување.

Магазин

Transmission – Музичка вечер со Васил Хаџиманов и Александар Петров

Transmission е музички концепт во кој тапанот ги спојува традицијата и денешницата, акустичната и електронската музика.

20 години од музичката симбиоза и пријателство (по Кавадаречка линија), Александар Петров заедно со Васил Хадџиманов преку проектот Transmission ги сплотуваат традиционалното и модерното преку звукот на тапанот и електронската музика.

Составен од два дела, првиот посветен на нивните херои од детството Никола Бадев, Кирил Манчевски и Зафир Хадџиманов во придружба на единствената Тања Царовска, додека вториот ќе раскаже еден понов период на творење осврнат кон електронската музика, која некои љубители, познавачи и издавачи ја означуваат како ORGANIC – PROGRESSIVE – HOUSE.

Музика во живо со: ХАЏИМАНОВ – ЦАРОВСКА – ПЕТРОВ – ВАСИЉЕВИЧ – ШАРЕВСКИ

Почеток во 20 часот, во Станица 26 na 24 Dekmvri

Картите по цена од 1000 денари се продаваат во THREE BAR & KITCHEN, Soma и Чашка

Магазин

Светот на диетите се менува: Пристигнува првата таблета за слабеење

Американската агенција за храна и лекови (ФДА) го одобри првиот лек за слабеење во облик на таблета, означувајќи значајна пресвртница во третманот на прекумерната телесна тежина. Информацијата ја објави данската фармацевтска компанија Novo Nordisk, производителот на лекот.

Новата таблета се зема еднаш дневно, а според компанијата, дава ист ефект како досегашната неделна инјекција. За разлика од други лекови за слабеење кои првично биле создадени за пациенти со дијабетес тип 2, овој лек е од почеток развиен исклучиво за губење на тежината.

Клиничките испитувања со приближно 1.300 учесници покажале импресивни резултати: во просек, корисниците изгубиле 16,6% од телесната тежина, додека околу една третина од нив успеале да намалат дури 20% или повеќе. „Пациентите ќе добијат практична таблета што се зема еднаш дневно и може да помогне да се изгуби исто толку тежина како и со оригиналната инјекција“, изјави извршниот директор на компанијата.

Очекувањата се дека таблетата ќе се појави на американскиот пазар почетокот на јануари 2026 година. Одобрувањето веднаш предизвика позитивен шок на берзата – акциите на Novo Nordisk пораснаа речиси 10% по затворањето на тргувањето во Њујорк.

Во Европа, лекот сè уште е достапен само како неделна инјекција и тоа со лекарски рецепт во одредени земји. Таблетата за европскиот пазар сè уште не е одобрена, а регулаторната одлука се очекува најрано во втората половина на 2026 година.

Магазин

Мега забавен парк од 1,1 милијарда долари „Дракула Ленд“ се отвора во Романија

Романија ја трансформира својата најпозната легенда во глобална туристичка атракција. Во близина на Букурешт е потврден изградбата на „Дракула Ленд“, мега-забавен комплекс вреден 1,1 милијарда долари, кој ќе биде целосно финансиран од приватни инвеститори.

На површина од 192 акри, новиот мега-парк ќе понуди над 40 атракции распоредени во шест тематски зони, инспирирани од легендата за Дракула и богатиот романски фолклор. Но „Дракула Ленд“ нема да биде само забавен парк – проектот предвидува луксузни хотели, арени за е-спорт, огромни концертни и шоу-простори, како и содржини за дневни и ноќни активности, привлекувајќи туристи од целиот свет.

Со оваа амбициозна инвестиција, Романија се стреми да создаде целосна туристичка дестинација што ќе се натпреварува со најпознатите европски тематски паркови. Изградбата е закажана да започне во септември 2026 година, а отворањето се планира веќе во 2027 година, доколку се следи планираниот ритам.

Со овој проект, Романија не само што сака да го оживее својот најпознат мит, туку и да се позиционира како една од водечките забавни и туристички дестинации во Европа, привлекувајќи милиони посетители секоја година.