Балкан

Симион го оспори изборниот резултат од претседателските избори во Романија пред Уставниот суд

Лидерот на крајната десница во Романија, Георге Симион, поднесе жалба до Уставниот суд, барајќи поништување на резултатите од повторените претседателски избори. Иако претходно го призна поразот од кандидатот Никушор Дан, Симион сега тврди дека располага со цврсти докази за странско мешање во изборниот процес.

Во своето официјално соопштение, Симион изјави дека изборите ќе ги оспори поради истиот основ на кој беа поништени и претходните избори во декември, нагласувајќи дека овојпат има „неоспорни докази за надворешно влијание“.

„Франција, Молдавија и уште неколку други странски актери се директно инволвирани во обидот да се манипулираат институциите, да се насочуваат медиумските наративи и да се наметне резултат што не ја одразува вистинската, суверена волја на романскиот народ“, истакна Симион, лидер на политичката платформа „Алијанса за обединување на Романците“.

Уставниот суд сè уште не се произнел по поднесената жалба, додека официјалните резултати и понатаму го потврдуваат победникот Никушор Дан.

Балкан

Вучиќ: Белград e под притисок од сите страни, без вистинска поддршка од светските сили

Српскиот претседател Александар Вучиќ изјави дека Србија формално останува на европскиот пат, но во практика нема поддршка од ниту една голема сила – ниту од Истокот, ниту од Европската Унија, ниту од Соединетите Американски Држави.

Говорејќи на годишната конференција со претставниците на дипломатско-конзуларната мрежа, Вучиќ оцени дека Србија не го почувствувала очекуваниот напредок во односите со САД, ниту во делот на царините, ниту во врска со санкциите кон Нафтената индустрија на Србија (НИС), која е во мнозинска руска сопственост.

Тој истакна дека кога Србија се соочувала со тешкотии, ниту една од големите сили не застанала отворено зад Белград, туку, како што рече, сите поставувале дополнителни барања и вршеле притисок, без да понудат конкретна поддршка.

Вучиќ потсети и на неусешниот обид за приближување кон новата американска администрација, кога српската делегација не учествуваше на планиран настан во Флорида. Воедно, тој повтори дека Србија не се откажува од ставот дека Косово и Метохија се составен дел од државата и нагласи дека, според него, меѓународните договори што се однесуваат на ова прашање не се почитуваат.

Балкан

Инцидент во Лерин: Македонска песна забранета на празнична прослава

За време на празничната прослава на Коледе во Лерин (Флорина), настап на македонската народна песна „Софка на татко“ беше прекинат по интервенција на градоначалникот Василеос Гианакис. Музичкиот бенд „Ендопика“ бил укажан дека не смее да пее на македонски јазик и дека песната може да се изведе исклучиво во инструментална форма.

Според активистот Павле Васкопулос, ваквите случаи на притисок и дискриминација не се новина за Македонците во Леринско, Костурско и Воденско. Тој истакна дека граѓаните кои јавно зборувале за своите права често биле етикетирани како „скопски агенти“. Телевизија 24 побара став од Општина Лерин, но до објавувањето на прилогот одговор не е добиен.

Црлиот текст може да го прочитате на Телевизија 24

Балкан

Снежно невреме го зафати регионот

Обилни снежни врнежи денес ја зафатија територијата на општина Кладово, а сите расположиви екипи се на терен и работат на расчистување на патиштата.

Градоначалникот Саша Николиќ ја посети локацијата заедно со дежурните служби за да се увери дека активностите се одвиваат според планот. „Сите надлежни служби, како и расположивата механизација, се на терен. Моментално се работи на расчистување на патот во населбата Пропажешќе, како и на патниот правец до Петрово Село“, изјави Николиќ за РИНА.

Тој апелираше до возачите да ја прилагодат брзината и вниманието на условите на патот и да ги следат препораките на надлежните служби. „Ги молам граѓаните да бидат дополнително внимателни во сообраќајот“, нагласи градоначалникот.