Спорт

Меси го изненади светот откако откри кој играч според него бил најдобар напаѓач

Лео Меси на крајот од кариерата: Легендата размислува за иднината, а откри и кој е неговиот омилен напаѓач

Лионел Меси, еден од најдобрите фудбалери во историјата на оваа игра, се наоѓа во завршната фаза од својата блескава кариера. По речиси две децении на врвот, прашање е дали легендарниот Аргентинец ќе стави крај на активното играње по истекот на договорот со Интер Мајами, или ќе продолжи уште една сезона.

Меси започна со професионален фудбал во 2004 година, дебитирајќи за Барселона, клуб со кој освои дури осум „Златни топки“ – повеќе од кој било друг фудбалер. Со каталонскиот гигант освои четири титули во Лигата на шампионите, додека со аргентинската репрезентација двапати ја подигна Копа Америка, а во 2022 година го оствари својот најголем сон – стана светски шампион.

Еден од најимпресивните моменти во неговата кариера останува рекордот од 91 постигнат гол во една календарска година – бројка што и ден-денес останува недостижна.

Иако неговата иднина во Интер Мајами сè уште не е целосно дефинирана, медиумите шпекулираат дека Меси ќе го продолжи договорот за уште една година. Дали тоа ќе биде неговата последна сезона или не, останува да се види.

Во текот на кариерата, Меси играл со и против некои од најголемите имиња на светскиот фудбал – Андрес Иниеста, Тиери Анри, Кристијано Роналдо, Нејмар, Вејн Руни и многу други. Сепак, кога станува збор за напаѓач што го импресионирал најмногу, одговорот е јасен.

„Роналдо Назарио беше феномен. Од сите напаѓачи што сум ги гледал, сметам дека тој е најдобар. Импресивен играч во секој аспект“, изјави Меси, оддавајќи признание на легендарниот Бразилец, кој исто така остави длабок печат во светскиот фудбал.

Додека фудбалскиот свет се подготвува за можна пензија на Меси, неговото наследство е одамна запечатено – не само преку бројките и трофеите, туку и преку страста, визијата и магијата што ги носеше на теренот.

Спорт

Астон Вила го преслуша Манчестер Јунајтед на „Вила Парк“

Aston Villa оствари значајна победа од 2:1 против Manchester United во натпревар од 17. коло во Premier League, одигран на „Вила Парк“.

Домашниот тим поведе пред крајот на првото полувреме кога Морган Роџерс погоди во 45. минута, по асистенција на Мекгин. „Црвените ѓаволи“ возвратија во судиското продолжение од првиот дел, кога Матеус Куња израмни на 1:1.

Во второто полувреме, Вила повторно ја презеде иницијативата, а повторно стрелец беше Роџерс, кој во 58. минута го постигна победничкиот гол по додавање од Оли Воткинс. До крајот на мечот Манчестер Јунајтед не успеа да се врати во игра, иако се обиде со неколку измени и офанзивен притисок.

Гостите добија и две жолти картони, на Угарте и Далот, што дополнително го отежна нивниот обид за пресврт.

Со оваа победа, Астон Вила продолжува со добрата форма на домашен терен и останува во чекор со екипите од горниот дел на табелата, додека Манчестер Јунајтед запиша уште еден неуспех во борбата за стабилност сезонава.

Спорт

Македонија стана полноправна членка на Медитеранската ракометна конфедерација

Македонската ракометна федерација (РФМ) денеска објави дека нашата земја е примена како полноправна членка на Медитеранската ракометна конфедерација. Досега Македонија имаше статус на придружна членка.

Одлуката беше донесена на седмиот конгрес на Медитеранската конфедерација, кој се одржа во рамките на изборниот конгрес на Меѓународната ракометна федерација во Каиро, Египет.

Следната година македонските ракометарки и ракометари ќе имаат активна улога на меѓународната сцена. Пионерките ќе учествуваат на Медитеранскиот шампионат во февруари во Приштина, додека кадетите ќе настапат во април во Словачка. Сениорите ќе се борат за медалите на Медитеранските игри во август во италијанскиот град Таранто.

Спорт

Омерагиќ: Посетата на Мамадов отвора нова фаза за македонскиот фудбал

Во „Куќа на фудбалот“ се одржа средба меѓу раководството на Фудбалската федерација на Македонија и Елкан Мамадов, директор за асоцијации и развој во ФИФА и еден од најблиските соработници на претседателот Џани Инфантино.

Претседателот на ФФМ, Масар Омерагиќ, истакна дека посетата на Мамадов претставува силна потврда за одличната соработка со ФИФА и континуираната поддршка што федерацијата ја добива во реализацијата на стратешките цели, со посебен акцент на инфраструктурата и зајакнувањето на националните селекции.

Омерагиќ најави дека веќе се договара и посета на претседателот на ФИФА, Џани Инфантино, во првата половина на 2026 година, што дополнително ќе ја зацврсти соработката и ќе отвори нови можности за развој на македонскиот фудбал.

Тој нагласи дека ФФМ останува целосно посветена на принципите што се од клучно значење за ФИФА – транспарентност, одговорност и долгорочен развој на фудбалот на сите нивоа во Македонија.