Свет

Германија ја пушта Украина да удира по Русија – па веднаш деманти: ‘Нема нов договор!‘

Германскиот канцелар Фридрих Мерц ја шокира јавноста со објава дека Украина сега може да го користи западното оружје без ограничувања на дометот – дури и за напади на воени цели во Русија! Но само неколку часа подоцна, следеше ладен туш: „Нема промена на курсот“, изјави неговиот заменик Ларс Клингбајл од редовите на СПД.

Мерц јасно порача дека Германија, заедно со Франција, Велика Британија и САД, повеќе не ги ограничува ударните способности на Украина. Овој драстичен заокрет, според него, е одговор на најголемите дронски напади на Русија од почетокот на војната, но и на целосниот неуспех на мировните иницијативи.

– Земја што може да се брани само на сопствена територија не е адекватно заштитена – изјави Мерц.

Но, додека траеа аплаузите од проукраинските кругови, вицеканцеларот Клингбајл излезе со сосема спротивна порака: „Не постои нов договор, ниту нова одлука – германската политика останува иста.“

Прашина повторно крена и чувствителното прашање за германските ракети Taurus, со домет од 500 километри, кои би можеле да стигнат дури до Москва. Мерц не ги спомена директно, но владата најави дека повеќе нема јавно да коментира детали за воената помош.

И додека едниот лидер зборува за слобода во ударот, другиот негира се – германската јавност, Европа и Русија остануваат во неизвесност: дали ова е почеток на нова ера во поддршката на Украина или само политичка збрка со опасни последици?

Свет

Хаос на европските аеродроми по воведувањето на новиот Шенген систем

Воведувањето на Шенген системот за влез и излез (EES) на 12 октомври 2025 година предизвика сериозни проблеми на аеродромите во Европа, при што патниците во периоди на зголемена фреквенција чекаат и до три часа за да поминат гранични контроли, соопшти Европскиот оддел на Меѓународниот совет на аеродроми (ACI).

Оттаму велат дека прогресивното снимање на биометриски податоци и регистрација на државјани од трети земји ја зголемуваат обработката на патниците до 70%, а недостигот на киосци и полициски кадар дополнително ја усложнува ситуацијата. Најзасегнати се аеродромите во Франција, Германија, Грција, Исланд, Италија, Португалија и Шпанија.

ACI повикува Европската комисија, eu-LISA, Фронтекс и земјите-членки итно да преземат мерки или да овозможат поголема флексибилност во примена на системот до целосното воведување. Генералниот директор на ACI EUROPE, Оливие Јанковец, предупредува дека доколку проблемите не се решат пред зголемувањето на прагот за регистрација на 35% од 9 јануари, хаосот на аеродромите ќе се продлабочи, со сериозни последици по безбедноста и оперативноста.

Свет

Украински дронови предизвикаа штета на руската нафтена инфраструктура во Таман

Украински беспилотни летала го погодиле руското пристаниште Таман во Црното Море, при што биле оштетени две пристаништа, еден цевковод за снабдување со мазут и два танкера, соопшти регионалната администрација на Краснодарската област. На едниот танкер избувнал пожар кој веќе е изгаснат, а два резервоари за складирање биле оштетени од падот на остатоци од дрон.

Службите за цивилна заштита информираат дека екипажите на погодените бродови се евакуирани, а пожарите се целосно изгаснати. Пристаништето Таман се смета за клучна точка за испорака на нафта и течен природен гас.

Украина зачестено ги напаѓа руските нафтени и енергетски објекти како дел од својата одбрана од руската инвазија.

Свет

Пентагон алармира: Кина тајно распоредила над 100 нуклеарни ракети – можно воено сценарио за Тајван до 2027

Најнов извештај на Пентагон, сè уште необјавен, открива дека Кина значително го забрзува својот нуклеарен капацитет и не покажува интерес за преговори за контрола на оружјето. Според американските разузнавачи, Пекинг тајно распоредил повеќе од 100 интерконтинентални балистички ракети од типот ДФ-31 во „полиња со силоси“ во близина на границата со Монголија, што им овозможува брзо лансирање во случај на конфликт.

Американскиот претседател Доналд Трамп претходно најави план за денуклеаризација во соработка со Кина и Русија, но извештајот на Пентагон укажува дека Пекинг не покажува сериозен интерес за такви мерки или разговори за контрола на вооружувањето.

Според документот, кинескиот нуклеарен арсенал сè уште брои под 600 боеви глави, но експанзијата продолжува, а до 2030 година се очекува бројката да надмине 1.000. Пентагон истакнува дека клучната година е 2027, кога Кина се проценува дека ќе биде способна да води и да победи во потенцијален конфликт за Тајван.

Стратегијата на Пекинг вклучува удари на далечина од 1.500 до 2.000 наутички милји од кинескиот брег, со што би можело сериозно да се попречи американското воено присуство во Азиско-пацифичкиот регион. Кина засега го застапува ставот дека се придржува до „нуклеарна стратегија на самоодбрана“ и политика на ненапаѓање, додека Пентагон предупредува на зголемената закана за стабилноста во регионот.