Црна Хроника

Откриени шокантни детали: Нарачани убиства, мафија од затвор и експлозив скриен во куќа – обвинителството удира по три најопасни банди!

Основното јавно обвинителство за гонење организиран криминал и корупција ја шокираше јавноста со обемна истрага против три структуирани и екстремно опасни криминални групи, инволвирани во најтешки кривични дела – вклучувајќи седум убиства, изнуда, продажба на дрога и палење на објекти.

Најголем дел од осомничените веќе се наоѓаат во притвор, а некои од нив, според обвинителството, продолжиле да организираат злосторства дури и од затвор. Во тек е потрага по неколкумина бегалци, а целиот процес бил проследен со огромни безбедносни ризици за истражителите.

Првото обвинение е насочено против групата „Беланоца“, која стои зад најмалку четири убиства – меѓу кои и масакрот во „Шиша бар“ и убиство во Ханиоти. Втората група, без јавна ознака, е инволвирана во уште три убиства, едно од нив двојно. Во шокантно сведочење, обвинителите открија дека некои од убиствата биле извршени поради пцовка, или сомневање дека жртвата соработувала со полицијата.

Обвинителите детално опишаа сценарија на убијци пратени во група, нарачани ликвидации координирани од затвор и обиди за елиминација на сведоци. Една жртва чудесно преживеала и ги препознала извршителите – по што бандата планирала и нејзино убиство.

Во посебен случај, бандата на Раде Трајковски – Штекли се товари за организирана продажба на кокаин и марихуана, најмногу во скопскиот Аеродром. Досега седум членови на оваа група прифатиле вина и добиле поблаги казни.

Најшокантни се деталите дека кај еден од лидерите на „Беланоца“ е пронајден ТНТ и полуавтоматско оружје, а многу од младите извршители на палењата биле платени ситни суми.

Обвинителката обелодени дека членовите на овие групи тврделе дека имаат врски „во сите структури“, што предизвикало сомнежи за можно инфилтрирање и во институциите. Доказите за можни корумпирани службеници се доставени до внатрешната контрола на МВР.

Случајот е означен како еден од најсериозните во поновата историја на македонското обвинителство. Судските процеси ќе почнат наскоро, а обвинителите бараат тие да се одвиваат по забрзана постапка, со рочишта секој ден.

Црна Хроника

Американецот со нигериско потекло приведен откако нападна полицаец во Скопје – ќе се соочи со притвор

Основното јавно обвинителство Скопје денеска соопшти дека издаде наредба за спроведување истражна постапка против американски државјанин со потекло од Нигерија, осомничен за напад врз полицаец и неовластено поседување оружје.

Според обвинителството, во текот на вчерашниот ден беа обезбедени докази за основано сомнение дека осомничениот сторил кривично дело „Неовластено држење, посредување и тргување со оружје и експлозивни материи“, како и „Напад врз службено лице при вршење работи на безбедноста“.

Инцидентот се случил на 21 декември во раните утрински часови пред ноќен клуб во Градскиот парк. Осомничениот физички нападнал полицаец кој се обидел да го легитимира, при што му нанел повреда со удари со тупаници. По нападот, мажот бил совладан, а кај него бил пронајден полуавтоматски пиштол „глок“ калибар 9мм со две рамки по 30 куршуми.

Потоа, во рамки на истрагата, обвинителството обезбедило наредба за претрес во хостелот каде што осомничениот престојувал. Таму биле пронајдени уште еден пиштол „глок“, три рамки со по 15 куршуми, дополнителни 75 куршуми во зипер ќеси, комплет за чистење оружје, три ножа и други предмети како фантомка, тактички ракавици, бандажери за раце и сајли за врзување. За сите предмети е издадена наредба за вештачење.

Јавниот обвинител поднел предлог до судијата на претходна постапка за определување притвор, оценувајќи дека постои реална опасност осомничениот да избегa, да влијае врз сведоците и доказите, како и да изврши ново кривично дело.

Црна Хроника

Семејно насилство во Тетово – Полицијата со брза интервенција

На 22.12.2025 во 00:55 часот на ул.,,29 Ноември“ во Тетово, полициски службеници од СВР Тетово го лишија од слобода А.Б.(20) од Тетово, постапувајќи по претходна пријава дека на 21.12.2025 околу 22:30 часот физички ја нападнал неговата 23-годишна вонбрачна сопруга. По целосно документирање на случајот, ќе следува соодветна пријава.

Црна Хроника

Македонија на трето место во Европа по убиства на жени од најблиските

Според најновите податоци на Евростат за 2023 година, анализирани од „Еуроњуз“, нашата земја зазеде загрижувачко трето место во Европа по стапката на убиени жени од партнер или член на семејството. Овие бројки ја осветлуваат мрачната реалност на родово-базираното насилство кое продолжува да ја загрижува македонската јавност.

Според статистиката, шест жени на милион жители во Македонија ја загубиле животната од рацете на блиски лица, што ја става земјата веднаш зад Латвија и Литванија. Латвија го држи црниот врв со 17 убиени жени на милион жители, додека Литванија е на второто место со 10. За споредба, просечната стапка во Европската Унија е 4,1 убиена жена на милион жители – речиси двојно помалку од македонската.

Евростат истакнува дека кога сторителите се партнери или членови на семејството, жените се жртви речиси двојно почесто од мажите. Најниски стапки во ЕУ, освен Малта, се бележат во Грција (1,8 на милион жители), Шпанија (2) и Холандија (2,3).

Податоците покажуваат дека бројот на вакви трагедии во ЕУ останува релативно стабилен во последната деценија, со блага стапка на раст, достигнувајќи 4,4 жени на милион жители во 2022 година.

Глобално, ситуацијата е уште алармантна. Според Обединетите нации, Африка е континентот со највисока стапка на фемицид – 30 жени на милион жители, а проценет број на жртви во 2024 година изнесува 22.600. Во поширокиот европски регион, стапката е пет жени на милион жители.

Околу 60% од овие убиствa се извршени од интимни партнери или членови на семејството. Обединетите нации ги квалификуваат ваквите злосторства како „фемицид“ – намерни убиства мотивирани од родово базирани фактори, вклучувајќи нееднакви односи на моќ, родови стереотипи и штетни општествени норми.