Балкан

СÈ ТРАЕЛО 30 СЕКУНДИ, ТИЈАНА БИЛА ВО ПАНИКА Детали за несреќата со парасејлинг која ја потресе Будва

Не знаеме која била причината да направи нешто такво, дали во тој момент таа била исклучително исплашена или се работи за нешто друго. Ова е навистина голема несреќа, а сè друго би било шпекулација, вели за агенцијата РИНА извор запознаен со случајот.

Веста дека 19-годишна девојка од Нови Сад загинала утрово додека била на парасејлинг во Будва го потресе регионот. Полицијата соопшти дека таа се одврзала од кабелот од својот падобран и паднала во водата од висина од повеќе од 50 метри. Снимката која се прошири на социјалните покажува дека од непознати причини, девојката се обидувала да се одврзе повеќе од 30 секунди и на крајот успеала.

– Она што го видовме длабоко нè потресе. Иако сè изгледаше во ред, девојката одеднаш почна да се одврзува неколку минути по почетокот на летот. Нејзините обиди траеја малку повеќе од 30 секунди, на нејзиното лице можеше да се види дека беше исплашена и во паника, а потоа успеа да се одврзе и падна во морето. Не знаеме која била причината да направи нешто такво, дали во тој момент била исклучително исплашена или се работи за нешто друго. Ова е навистина голема несреќа, а сè друго би било шпекулација – вели за агенцијата РИНА извор запознаен со случајот.

Откако паднала во вода, Тијана било пренесена со брод до градската марина, но екипата на брзата помош можела само да ја констатира нејзината смрт.

Соседите на семејството на Тијана во Детелинара низ солзи објаснија како дознале за несреќата:

– Не можам да поверувам дека ова е вистина. Тијана беше прекрасно дете. Целото семејство е прекрасно. Таткото и мајката и нивните две деца. Таткото таксист и мајката фризерка се млади луѓе кои се подготвени да им помогнат на сите. Тијана има помлад брат. Таа учеше на училиште и беше многу одговорна. Се надевам дека ова навистина не е вистина. Вознемирена сум и не знам како да ги пречекам Горан и Бранкица ако ова е вистина. Како да ја погледнам нејзината мајка, што да му кажам на татко ѝ – вознемирено објасни сосетката за српска „Република“.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.