Економија

НОВИОТ ГУВЕРНЕР Е ИЗБРАН – ТРАЈКО СЛАВЕСКИ ВЛЕГУВА ВО НАРОДНАТА БАНКА

Универзитетскиот професор Трајко Славески е шестиот гувернер на Народната банка на Македонија. Парламентарното мнозинсто со 68 гласови „за“ и 16 „против“ го верификуваше неговиот седумгодишен мандат.

Пратениците не ја оспоруваа стручноста на Славески, но опозицијата реагираше на неговите ставови и на поврзаноста со ВМРО-ДПМНЕ. Како што нагласија, тоа може да се одрази, односно да ја загрози независноста на Народната банка.

Славески на оваа функција преминува од претседателското столче во Советот на Град Скопје, каде што влезе по изборите во 2021 година како носител на советничката листа на коалицијата предводена од ВМРО-ДПМНЕ.

Професор е на Економскиот факултет при Универзитетот „Св. Кирил и Методиј“ во Скопје, каде што и самиот ги минал сите образовни нивоа – додипломски студии (1983), магистртура (1988) и докторат (1997). Во меѓувреме бил на пост-дипломски студии на Калифорнискиот државен Универзитет во Чико, САД (1986/87) и на Универзитетот Харвард (1989/90).

Славески бил визитинг професор на државниот Универзитет во Аризона во 1997 година. Во периодот 1999-2006 година предавал на последипломскиот студиум South Easteren European Studies на Националниот и каподистриски Универзитет во Атина, Грција.

Фокусот на неговите предавања и истражувања се макроекономијата, меѓународните финансии, транзицијата на економиите од социјализам кон пазарен систем, и економските политики во земјите во развој. Автор е на голем број научни трудови, публикации и учесник на меѓународни конференции. Во текот на криерата соработувал и со меѓународни институции како Светска банка и УНДП, особено во областа на реформите и стратегиите за економски развој.

Коавтор е на првата антиинфлаторна програма што се изработи и усвои во рамките на монетарното осамостојување на Македонија во април 1992 година. Исто така, беше министер за развој и за финансии.

Славески е долгогодишен член на ВМРО-ДПМНЕ, кој учествувал во изработката на програмските документи на партијата.

Согласно член 50 од Законот за Народната банка, гувернерот за време на мандатот не смее да е поврзан со политичка партија:

„Гувернерот и вицегувернерите на Народната банка се професионално ангажирани во Народната банка, не смеат да имаат друг работен ангажман без оглед дали за тоа добиваат надоместок или не, освен ангажман како универзитетски професор или ангажман во научноистражувачка институција, или времен ангажман во меѓународна финансиска институција, не смеат да бидат сопственици на капитал во финансиска институција во Република Северна Македонија и за време на мандатот не смеат да бидат членови на политичка партија или синдикат“.

Славески доаѓа на местото на Анита Ангеловска-Бежоска, која како прва гувернерка раководеше со Народната банка во изминатите седум години. Претходно гувернери беа Димитар Богов (2011-2018), Петар Гошев (2004-2011), Љубе Трпески (1997-2004) и Борко Станоевски, последниот гувернер од југословенско време и првиот во самостојна Македонија.

Економија

Германската економија е во загуба 200 милијарди евра од боледувања

Германија се соочува со растечки економски товар од боледувањата на вработените. Минатата година, производствените загуби и исплатите на плати за време на боледување ја чинеле германската економија повеќе од 200 милијарди евра, објави владата.

Според статистиката, секој вработен во просек отсуствувал од работа по 20,8 дена, што е речиси четири дена повеќе отколку во 2020 година. Вкупно се забележани 881,5 милиони денови боледување, а секој изгубен работен ден компаниите го чинел во просек 152 евра.

Како најчести причини за отсуство од работа биле наведени проблеми со мускулно-скелетниот систем, заболувања на респираторните органи и психички нарушувања. Производствените загуби достигнале 134 милијарди евра, додека трошоците за надоместок на плати изнесувале 72,3 милијарди – за 26 отсто повеќе од пред пет години.

Најмногу погодени се секторите здравство, социјални служби, метална индустрија, јавна администрација и трговија, додека финансискиот сектор и угостителството бележат најниски стапки на боледување.

Штефан Гент, директор на Германската федерација на трговци на мало, предупредува дека високата стапка на боледувања го зголемува товарот врз компаниите и ја намалува нивната конкурентност. Тој го посочува и телефонското добивање на потврди за боледување како еден од проблемите, предлагајќи укинување на овој начин на работа.

Економија

ИКЕА пристигнува и во Македонија

Идејата за отворање на ИКЕА во Македонија не е нова – за неа се зборува повеќе од една деценија. По неколку неуспешни обиди, шведскиот бренд кој ја освои светската малопродажба на мебел, конечно се чини дека ќе стапи и на македонскиот пазар.

Веста неодамна ја потврди новоформираната Шведско-Македонска стопанска комора. Извршниот директор, Самуел Наумовски Викиус, во разговор за медиумите во Скопје изјави дека преговорите за влезот на ИКЕА во Македонија се во завршна фаза. „Има простор за работа на ИКЕА во нашата земја, а иницијативата е поддржана и од шведскиот амбасадор“, рече Наумовски Викиус, додавајќи дека комората активно работи на ова прашање.

ИКЕА е еден од најпознатите меѓународни брендови за мебел со силно присуство во регионот, вклучувајќи ги Грција, Бугарија, Србија и Хрватска. За споредба, инвестицијата за стоковната куќа „Икеа – Белград Исток“ изнесуваше 70 милиони евра за објект од 35.000 квадратни метри и отвори повеќе од 400 нови работни места. Во Хрватска, пак, во 2014 година, ИКЕА вложи околу 100 милиони евра и првично вработи 350 лица.

Македонските купувачи во меѓувреме имаат ограничен пристап до интернет-страниците на ИКЕА: грчката и бугарската веб-страница се достапни само од нивните земји, додека македонските граѓани можат да се информираат преку сајтовите во Србија (ikea.rs) и Хрватска (ikea.hr).

Со оглед на досегашното искуство на ИКЕА во регионот, отворањето на првата продавница во Македонија се очекува да донесе значителни инвестиции и нови работни места, а граѓаните конечно ќе имаат можност да ги купуваат светски познатите производи на локално ниво.

Економија

Подари моменти на радост, подари „Среќа плус“

Новогодишниот период носи посебна атмосфера – време кога сме поблиску едни до други, славиме нови почетоци, истовремено осврнувајќи се на годината што изминува. Во овие празнични денови секогаш го бараме идеалниот подарок што ќе ги израдува нашите најблиски. Вистинската вредност на подарокот се мери со насмевките и среќата што ја носи, па токму затоа овој период е совршен за подарување шанса за среќа.

Шареноликата понуда на инстант лозови на Државна лотарија, во ковертите „Среќа плус“ со разновидни дизајни, наменети како подарок за различни поводи се токму тоа – симболичен гест, којшто во мал коверт носи шанса за големи добивки. Со „Среќа плус“ не подарувате само инстант лоз – подарувате мигови исполнети со надеж, исчекување и можност новата година да започне со убави изненадувања.

Во еден коверт „Среќа плус“ се кријат можности за исполнување на многу новогодишни желби – сопствен стан, автомобил, мотор и големи парични добивки. Инстант лотаријата ја дополнува магијата на празниците, носејќи ја шансата соништата да се претворат во реалност.

Овие празници подарете моменти на среќа на оние што ви значат, затоа што најубавите подароци се оние што носат надеж, радост и верба дека убавите изненадувања се поблиску отколку што мислиме и нѐ потсетуваат дека среќата е насекаде околу нас!