Македонија

Мицкоски: Европа има шанса да ја исправи историската неправда

Премиерот Христијан Мицкоски изјави дека Европа има можност да исправи историска неправда нанесена на македонскиот народ, коментирајќи ја работната верзија од извештајот на европратеникот Илхан Ќучук Вајц, каде што, како што рече, за првпат експлицитно се признава постоењето на посебен македонски идентитет.

„Овој извештај е значаен бидејќи за првпат се наведува македонскиот идентитет како посебен. Тоа е чекор напред, но одредени европратеници, вклучително и пратеници од нашата сестринска партија ГЕРБ, предлагаат пред терминот ’македонски идентитет’ да се додаде зборот ’сегашен’. Тоа е проблематично и потврдува за што предупредувавме уште од почетокот – дека се создава концепт на ’вештачка нација’“, рече Мицкоски одговарајќи на новинарско прашање.

Тој нагласи дека веќе имал интензивни разговори со влијателни претставници во Европскиот парламент и институциите во Брисел и порача дека нема да прифати формулации кои го доведуваат во прашање историскиот и национален континуитет на македонскиот народ.

„Ова не е прашање на неколку стотини граѓани кои се идентификуваат како Бугари. Ова е обид за системска промена на идентитетот на целиот македонски народ. Јас тоа нема да го прифатам. Таквите формулации не се во духот на европските вредности и претставуваат опасен преседан“, истакна Мицкоски.

Тој ја обвини претходната влада, предводена од Димитар Ковачевски и поранешниот министер за надворешни работи Бујар Османи, дека со прифаќањето на таканаречениот „француски предлог“ ја ставиле Македонија во подредена позиција.

„Европа сега има можност да покаже интегритет. Нема едногласност, што значи дека постои простор за корекција. Чекам Европа да даде одговор и да ја исправи грешката направена со прифаќањето на предлогот од страна на тогашната влада“, рече премиерот.

Според него, официјална Софија никогаш не се откажала од ставовите кои, како што оцени, се во духот на „Живковизмот“, со тенденција да го прикаже македонскиот идентитет како изведен од бугарскиот.

Македонија

15 години борба против насилството врз жени: Хуманитарен настан во МКЦ

Денеска во Кино Фросина при МКЦ ќе се одржи посебен хуманитарен настан со кој ќе се одбележи 15-годишниот јубилеј на Националната мрежа против насилство врз жени и семејно насилство. Настанот започнува во 18:30 часот, а собраните донации ќе бидат наменети за Интервентниот женски фонд, кој обезбедува директна помош на жени-жртви на насилство кои сакаат да ја напуштат опасната средина.

Националната мрежа, која денес брои 25 организации членки, 15 години активно работи на препознавање и заштита на жените од родово базирано насилство и семејни форми на злоупотреба, се залага против фемицид и силно застапува за правата и интересите на жртвите. Овој јубилеј е не само повод за прослава, туку и потсетник за важноста од поддршка и солидарност кон жените кои секојдневно се соочуваат со насилство.

Со купување на билет за настанот, можете да донирате средства за Интервентниот женски фонд: 15 години – Од тишина во глас – Друга страна

Македонија

Во Центар Жупа нема конкуренција: Кампањата за локални избори стартува во 4 општини

Градоначалничките избори во Гостивар, Маврово и Ростуше, Врапчиште и Центар Жупа ќе се повторуваат на 11 јануари 2026 година, откако на локалните избори во 2025 година во овие општини не беше остварен потребниот излез за гласање.

Според Роковникот за изборни дејствија, изборната кампања за првиот круг започна на полноќ на 22 декември и ќе трае до 9 јануари, кога официјално ќе започне молкот пред гласањето.

Во Гостивар конкуренција ќе водат Невзат Бејта, кандидат на коалицијата „Вреди“, и независниот Ваљбон Лимани, поддржан од НАИ. Во Врапчиште, за градоначалничкото место ќе се борат Исен Шабани од НАИ и Зуљхајрат Демири, кој се кандидира преку група избирачи.

Центар Жупа ќе има само еден кандидат – Аријан Ибраим од Демократската партија на Турците, додека во Маврово и Ростуше ќе се сретнат Онер Јакупоски од коалицијата „Твоја Македонија“ предводена од ВМРО-ДПМНЕ и Анес Ахмети од СДСМ.

Причината за повтореното гласање е недоволната излезност на локалните избори на 19 октомври 2025 година. Според податоците од Државната изборна комисија, само во Гостивар се остварени 33,31% од гласачите, додека во Врапчиште излезноста беше 25,18%, во Маврово и Ростуше 30,31%, а во Центар Жупа едвај 21,49%. Законската граница од една третина од запишаните гласачи, која е потребна за изборите да бидат успешни, не беше достигната.

Со овие бројки, четирите општини повторно се соочуваат со неизвесност, а кампањата која започнува сега ќе биде клучна за мотивирање на гласачите да се појават на биралиштата.

Македонија

Снежна покривка до 10 см и поројни врнежи дожд во Македонија

Под влијание на влажни воздушни бранови, од утре навечер и во текот на 24 и 25 декември 2025 година, Македонија ќе биде погодена со повремени локални врнежи од дожд, кои на некои места ќе бидат пообилни и над 25 литри на квадратен метар за 24 часа.

На планинските предели врнежите ќе бидат од снег, со формирање на снежна покривка од 5 до 10 сантиметри. Со спуштањето на постуден воздух од север, снег ќе се појави и на повисоките места во низинските региони. Од петок се очекува стабилизирање на времето.

Во Скопје, утре навечер и во следните два дена се предвидуваат повремени врнежи од дожд, кои на моменти ќе бидат пообилни. Граѓаните се советуваат да бидат внимателни на патиштата и да ги следат официјалните предупредувања за времето.