Во повеќе од 30 градови низ Србија, синоќа се одржаа синхронизирани студентски протести на кои беше прочитан заеднички говор со јасна порака: бараат предвремени парламентарни избори и враќање на демократската одговорност.

Во говорот, студентите нагласија дека овој момент претставува историска пресвртница за земјата и дека протестите не се само младинска реакција, туку движење на разумот, достоинството и отпорот кон неправдата.

„Повеќе од шест месеци бараме вистина и правда. Го покренавме најголемиот бран студентски демонстрации во Европа во последните 50 години и ги одржавме најмасовните протестни собири во историјата на Србија“, беше прочитано на протестите.

Студентите истакнаа дека преку мирен отпор и институционални канали досега не добиле соодветен одговор, туку се соочиле со „навреди, закани, малтретирање и манипулации“.

„Не е ова само студентски протест, туку протест на сите граѓани кои чувствуваат дека се изиграни, понижени и замолчени. Оние што не се слушаат имаат право да викаат“, порачаа организаторите.

Еден од клучните сегменти од говорот беше и најава за граѓанска непослушност низ целата земја.

„Ќе бидеме пред институциите, министерствата, пред телевизиите што молчат. Ќе ги вознемируваме лагите, неправдата и корупцијата – не граѓаните“, се вели во пораката.

Според студентите, системот е толку длабоко корумпиран што не е способен да ги исполни нивните барања.

„Бараме избори. Гласот на младите не е само врева – тој е бран кој може да иницира промени, да го врати достоинството и да ја разбуди надежта во правдата и слободата. Демократијата не смее да остане само празно ветување“, беше пораката што одекна од север до југ на Србија.