Свет

Украински напади оставија стотици илјади Руси без електрична енергија

Украински артилериски и дронски напади предизвикале големи прекини во снабдувањето со електрична енергија на териториите под руска контрола во регионите Запорожје и Херсон, оставајќи стотици илјади граѓани во мрак, соопштија руските власти.

Според нивните тврдења, функционирањето на нуклеарната електрана во Запорожје – најголемата од овој вид во Европа, која Русија ја зазеде во првите недели од инвазијата врз Украина во 2022 година – не е загрозено. Властите уверуваат дека нивото на радијација е во рамките на нормалата, а електраната е во режим на мирување и не произведува струја.

Нападите дојдоа веднаш по мировни преговори

Московските гувернери во овие региони – кои Русија ги смета за клучни и чие отстапување од страна на Украина го поставува како услов за прекин на војната – информираа дека по нападите биле принудени да воведат итни мерки за заштеда на енергија.

„Поради гранатирањето од страна на украинската армија, сериозно е оштетена високонапонската инфраструктура во северозападниот дел од Запорошката област“, напиша гувернерот Евгениј Балицки на „Телеграм“. Тој додаде дека повеќе од 600.000 луѓе во речиси 500 населени места останале без електрична енергија.

Овие напади се случија само неколку часа по новата рунда мировни преговори меѓу руската и украинската делегација во Турција, на кои Москва повторно го истакна својот барачки став – откажување од територии и прифаќање воени ограничувања од страна на Киев, како предуслов за прекин на конфликтот.

Слична состојба и во Херсон

Во сличен контекст, и во соседната Херсонска област е регистрирано големо нарушување на енергетскиот систем. Рускиот гувернер Владимир Салдо изјави дека остатоци од соборени украински дронови оштетиле две трафостаници, поради што над 100.000 жители во 150 градови и села останале без електрична енергија. Итните служби се на терен и работат на нормализирање на снабдувањето.

Локалните власти наредија штедење струја, додека здравствените установи се префрлени на алтернативни извори на напојување.

Како потсетување, за време на изминатата зима, многу украински градови и села се соочуваа со слични проблеми поради континуираните руски напади врз нивната енергетска инфраструктура. Сега, ситуацијата изгледа привремено е обратна.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.