Економија

Законските измени за репрезентативност на синдикатите: Пратениците и синдикатите на отворена средба за поголема застапеност во Економско-социјалниот совет

Претседателот на Комисијата за економски прашања, труд и енергетска политика, Бојан Стојаноски, заедно со пратениците Даниела Велимова и Беким Сали, денеска одржаа отворена средба со претставници на синдикатите во Собранието на Република Северна Македонија. Тема на средбата беа законските измени кои предвидуваат намалување на прагот за репрезентативност на синдикатите од 10 на 5%, со цел поголема застапеност и учество во Економско-социјалниот совет.

Стојаноски истакна дека измените се направени со конзенсус и дека намалувањето на условот за репрезентативност ќе овозможи поголема демократизација на советот и поголем број работници да бидат претставени. „Се надеваме дека со повеќе синдикати ќе може да се врши поголем притисок и врз работодавачите и врз Владата за исполнување на синдикалните барања“, додаде тој.

И покрај отворениот повик, дел од синдикатите, вклучително и претставници од Сојузот на синдикатите на Македонија (ССМ), не присуствуваа на средбата. Стојаноски посочи дека претседателот на ССМ бил лично поканет и дека поканата останува отворена.

Марјан Ристески, претседател на Конфедерацијата на синдикални организации на Македонија (КСОМ), го поздрави предлогот за намалување на прагот, оценувајќи дека тоа ќе донесе поквалитетен социјален дијалог и ќе ги вклучи помалите синдикати во советот. Тој упати повик и до ССМ да се приклучи на дијалогот.

Слободан Антовски, претседател на Унијата на независни и автономни синдикати на Македонија (УНАСМ), ја поздрави одлуката и изрази надеж дека сега и помалите синдикати ќе можат да бидат дел од советот, што претходно не било возможно поради отпорот на поголемите синдикати.

Благоја Рапалковски, претседател на Конфедерацијата на слободни синдикати (КСС), нагласи дека законските измени се во согласност со препораките на Меѓународната организација на трудот и ќе придонесат за демократизација на синдикалното организирање.

Овие законски промени се очекува да ја подобрат социјалната клима и дијалогот меѓу синдикатите, работодавачите и Владата, со што ќе се обезбеди подобра заштита на работничките права во земјата.

Економија

Странски „хај-тек“ инвестиции од Германија и Турција: 80 милиони евра и илјада нови работни места

Македонската економија влегува во нова фаза на развој со најавата за две значајни странски инвестиции во областа на високата технологија. Премиерот Христијан Мицкоски соопшти дека германска и турска компанија ќе инвестираат околу 80 милиони евра, носејќи свеж капитал надвор од досега доминантната автомобилска индустрија.

Според најавите, двата проекта ќе имаат силен извозен карактер и значајна додадена вредност. Се очекува годишен извоз од над 200 милиони евра, како и отворање на приближно 1.000 нови работни места, главно во сегментот на високо квалификуван кадар.

Мицкоски истакна дека ваквите инвестиции го потврдуваат стратешкото насочување на државата кон високо-технолошки индустрии, со цел диверзификација на економијата и намалување на зависноста од еден сектор. Тој изрази оптимизам дека до крајот на годината ќе следат уште нови странски вложувања.

Најавените проекти се оценуваат како јасен сигнал за подобрена инвестициска клима и дел од пошироките напори за привлекување современи технологии, повисоки плати и одржлив економски раст.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.