Свет

Изјавата на новиот претседател на Полска е ново разочарување за Украина

Новo избраниот претседател на Полска против приклучување на Украина во ЕУ – Русија ја нарече неоимперијална закана

Новoизбраниот претседател на Полска, Карол Навроцки, изјави дека во моментот е против приклучувањето на Украина во Европската Унија, посочувајќи дека Полска треба да ја поддржува Украина од стратешки и геополитички причини, но и дека има свои национални интереси што мора да бидат земени предвид.

Во интервју за унгарскиот портал Mandiner.hu, Навроцки оцени дека Русија претставува најголема закана за регионот, нарекувајќи ја „постимперијална и неокомунистичка држава“ предводена од, како што рече, „воениот злосторникот Владимир Путин“.

„Како антикомунист, длабоко сум критичен кон Руската Федерација. Таа е авторитарна држава што претставува егзистенцијална закана за Источна Европа. Како поранешен директор на Институтот за национално сеќавање, лично сум прогонуван од Москва – ми се закануваат пет години затвор во логор за воени заробеници“, изјави Навроцки.

Тој додаде дека Полска ја одиграла една од клучните улоги во поддршката на Украина, особено благодарение на заложбите на претседателот Анджеј Дуда и солидарноста на полскиот народ, но и нагласи дека Киев мора да ги разбере и националните интереси на други држави, како Полска и Унгарија.

„Поддршката не значи откажување од сопствениот суверенитет или интереси“, истакна Навроцки, додавајќи дека Европа мора да постапува прагматично во односите со Украина и поширокиот источен блок.

Карол Навроцки победи на претседателските избори во Полска во вториот круг што се одржа на 1 јуни, со освоени 50,89 отсто од гласовите, победувајќи го противкандидатот Рафал Тшасковски, кој освои 49,11 отсто.

Свет

Политичка шега од Трамп: сатирична плоча на Белата куќа го исмеа Бајден

Администрацијата на Доналд Трамп го исмеа поранешниот претседател Џо Бајден со провокативна плоча поставена на Белата куќа. На неа Бајден е означен како „најлошиот претседател во американската историја“ и се тврди дека ја водел нацијата „до работ на уништување“. Плочата ја повторува и старата навредлива етикета на Трамп – „Заспаниот Џо Бајден“ (Sleepy Joe Biden), која тој постојано ја користеше за време на претседателската кампања за да го прикаже својот ривал како слаб и неспособен.

Натписот исто така го повторува неоснованото тврдење на Трамп дека изборите во 2020 година биле „наместени“ и ја обвинува Бајден за почетокот на војната во Украина во 2022 година, пишува ДПА.

Плочата е дел од претседателската галерија на портрети во Белата куќа. Кога галеријата беше откриена, вниманието привлече отсуството на портрет на Бајден – наместо тоа, беше прикажан „автопен“ (autopen), механички уред кој автоматски ги репродуцира рачните потписи на претседателот.

Иако автопенот долго време се користи за рутински административни потписи, републиканците ја критикуваа администрацијата на Бајден, обвинувајќи ја дека го користела уредот за голем број помилувања без директно одобрение од претседателот.

Во меѓувреме, Републиканците постојано го доведуваа во прашање менталниот и физичкиот капацитет на Бајден, кој неодамна наполни 83 години, да ги извршува целосно своите должности до крајот на мандатот, завршен во јануари 2025 година. Бајден, пак, за „Њујорк Тајмс“ потврди дека лично ги одобрил сите помилувања издадени на крајот на неговиот претседателски мандат.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.