Република

Љутков и Коњановски: Битола чекори напред со културата и туризмот

Министерот за култура и туризам, Зоран Љутков, денеска оствари работна посета на Битола, при што заедно со градоначалникот Тони Коњановски ја посетија дел од националните установи од областа на културата. Целта на посетата беше евалуација на досегашната реализација на програмите и потврда на поддршката што државата ја дава за културниот и туристички развој на градот.

„Во сите институции е направен значаен чекор напред. Работат со двојно поголеми буџети и реализираат проекти кои директно ја подобруваат понудата,“ изјави министерот Љутков. Тој најави дека во Завод и музеј Битола се реализираат проекти за реставрација и уредување со вредност од над 2,5 милиони денари, а археолошките истражувања ширум државата, кои со години беа запоставени, сега повторно добиваат поддршка од 12 милиони денари за следните три години.

Љутков ја потенцираше и реновираната сувенирница во рамки на музејот, изградена со сопствени средства, како позитивен пример за туристичка понуда која се темели на локални ресурси.

Градоначалникот Коњановски истакна дека Битола е културна мека со седум национални установи, а во изминатите години градот доживеал вистински процут во областа на културата.

„Се гордеам што сме град кој живее култура. Нашите и нивните настани се исти – делиме визија и заедничка енергија,“ рече Коњановски, кој најави и почеток на културното лето со интересен настан.

Министерот Љутков најави и реализација на капитален проект – реконструкција, санација и адаптација на старото Кино „Партизан“, со буџет од 94 милиони денари. Договорите со изведувач и надзор се веќе потпишани, а работите ќе започнат до крајот на месецот.

Битола останува пример за успешна синергија помеѓу државната политика и локалната културна визија, со растечка туристичка и културна понуда.

Република

Општина Битола: Панел дискусија за унапредување на услугите од јавните претпријатија

Општина Битола и Советот на Општина Битола организираат панел дискусија на тема „Како до подобри услуги за граѓаните од јавните претпријатија“, со цел отворање поширока јавна дебата за улогата и предизвиците на јавните претпријатија како сервис на граѓаните.

Во изминатиот период, јавните претпријатија се соочија со сериозни предизвици, почнувајќи од последиците од ковид пандемијата, преку енергетската криза, до напорите за нивна финансиска и организациска стабилизација. Токму овие состојби ја наметнуваат потребата од системско унапредување на квалитетот на услугите што ги добиваат граѓаните.

На панел дискусијата ќе учествуваат градоначалникот на Битола, претседателот на Советот, директорите на јавните претпријатија, како и експерти од областа. Отворена е покана и за поранешни директори, пратеници, советници, претставници на граѓански организации и медиумите, со цел да се обезбеди инклузивна и конструктивна расправа.

Настанот ќе се одржи в петок, на 19 декември, со почеток во 13:30 часот, во киното „Манаки“ во Битола.

Република

Проданоски: Прилеп подготвен за Св. Никола – над 25.000 светиниколски сармички и богата празнична програма

Прилеп е целосно подготвен за одбележувањето на патрониот празник на градот – Св. Никола, со почитување на вековната традиција и силен дух на заедништво. Во пресрет на градската слава, околу 40 жени од четири прилепски здруженија – „Китка“, „Мајка Традиција“, „Преродба“ и „Орхидеја“ – започнаа со подготовка на препознатливите светиниколски мали сармички, кулинарски специјалитет карактеристичен само за Прилеп. Годинава ќе бидат подготвени повеќе од 25.000 посни сармички.

Градоначалникот Дејан Проданоски, заедно со претставници на овогодишните домаќини на градската слава, компаниите „Матадор“ и „Бимфоод“, ги посети жените во просториите на „Бимфоод“, каде што се одвиваше подготовката на специјалитетот.

Проданоски истакна дека враќањето и негувањето на традицијата е особено важно, нагласувајќи дека во подготовките учествуваат и млади генерации, кои на тој начин учат за културното наследство на градот.

По повод празникот Св. Никола, градоначалникот ги повика сите граѓани и посетители на 19 декември да бидат дел од чествувањето на градската слава, која, како што нагласи, симболизира мирољубивост, смирение и љубов.

Чествувањето ќе започне во 08:00 часот со Архиерејска божествена литургија во храмот „Св. Благовештение“, со која ќе чиноначалствува Митрополитот Преспанско-пелагониски г. Петар. Во 12:00 часот ќе се одржат водосветот и прережувањето на празничниот колач пред параклисот „Св. Никола“ во центарот на градот.

По официјалниот дел, за сите добронамерници ќе биде послужена празнична посна светиниколска трпеза во централното градско подрачје. Во рамки на градската слава, на плоштадот „Александрија“ ќе се одржи и пригодна забавна програма, а на Камената бина ќе настапи прилепската музичка група „Тајфата“.

Република

Повеќе делови од Тетово утре без електрична енергија

Повеќе делови од Тетово утре, 17 декември 2025 година, ќе останат без електрична енергија поради планирани прекини во дистрибутивната мрежа.

Според најавата, прекините ќе се одвиваат во периодот од 09:00 до 14:30 часот и ќе зафатат различни делови од градот. Без струја ќе бидат објекти на улицата „Борис Кидрич“, како и делови во кругот на поранешната печатница „Напредок“.

Дополнително, прекин е најавен и за делови од Тетово во населбите Два Бреста и Певчина, каде електричната енергија ќе биде исклучена во периодот од 09:20 до 13:00 часот.

Од надлежните служби информираат дека станува збор за планирани активности и апелираат до граѓаните навремено да ги прилагодат своите обврски.