Балкан

Туристите разочарани од цените во Хрватска: „Не знам дали ќе се вратиме“

Хрватска губи туристи поради високите цени: „Не знам дали ќе се вратиме“

Хрватска, некогашна ѕвезда меѓу поволните летни дестинации во Европа, се соочува со сериозна туристичка криза. Британскиот весник Express пишува дека растечките цени одвраќаат сè поголем број посетители, што претставува сериозен удар за тамошниот туристички сектор.

Во последните три години, цените во туристичката индустрија пораснале за дури 50 отсто, што ја прави Хрватска поскапа од нејзините конкуренти – Шпанија и Грција, каде цените во истиот период се зголемиле за 15 до 20 проценти. Овој драстичен пораст ѝ ја загрозува репутацијата како достапна дестинација, особено за туристи од Германија, Австрија, Чешка и Италија.

Иако земјата има некои од најниските цени на енергија во Европската Унија, како и повластена стапка на ДДВ од 13% за туризмот, главната причина за ценовниот скок се зголемените оперативни трошоци во угостителството.

Последиците веќе се видливи – бројот на ноќевања стагнира, а потрошувачката на туристите опаѓа. Минатата година, во екот на летната сезона, приходите од странски туристи опаднале за 0,7% во споредба со претходната година.

Незадоволството кај посетителите расте, особено на платформите за патнички рецензии како Tripadvisor. Еден турист од Норвешка напиша:
„Сè е многу поскапо од порано. Цените се нереално високи – легло на плажа чини 25 до 30 евра. Хрватска беше наш прв избор за летување, но сега сè стана прескапо. Не знам дали повторно ќе дојдеме. Жал ми е што земјата оди во овој правец.“

Од друга страна, има и поумерени реакции. Турист од Обединетото Кралство коментирал:
„Ги споредивме трошоците во Ровињ минатата година со оние на Хвар ова лето – немаше голема разлика во цените. Единствена разлика беше што Ровињ нудеше подобар избор на вино во кани.“

Се чини дека сликата е поделена, но растечките цени стануваат сè посериозен предизвик за Хрватска и нејзината туристичка иднина.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.