Балкан

ПОБАРАНО ПОГОЛЕМА ЗАСТАПЕНОСТ НА МАКЕДОНЦИТЕ ВО АЛБАНСКАТА ПОЛИЦИЈА

12 јуни 2025 година, Драч, Албанија – Од исклучителна важност е македонската заедница, како и другите заедници во Албанија, да бидат соодветно застапени во редовите на Државната полиција, изјави лидерот на единствената македонска партија во Албанија – Македонска алијанса за европска интеграција, Васил Стерјовски на семинарот организиран од Единицата за соработка против дискриминација при Советот на Европа, одржан во Драч, Албанија.

Тоа, оцени тој, не само што го зајакнува претставувањето, туку и ја зголемува довербата на граѓаните во државните институции и придонесува кон побезбедно и поинклузивно општество.

Во општина Пустец, која претежно е населена со Македонци, раководителот на полициската станица треба да биде од редовите на Македонската заедница, за да се обезбеди правична застапеност и изградба на взаемна доверба, – нагласи Васил Стерјовски.

Во излагањето потсети дека во почетоците на демократските процеси во Албанија, по падот на комунистичкиот режим во раните 90-ти години, малцинствата често беа гледани како закана за државата.

Во тој период, во рамки на формирањето на националната полиција и армија, сите припадници на Македонската заедница, како и на другите заедници, беа исклучени од редовите на безбедносните сили. Денес времињата се променети и затоа од големо значење е вклучувањето на припадниците на заедниците во редовите на безбедносните сили, – рече Стерјовски.

На регионалниот семинар за претставници на институциите за спроведување на законот и граѓанското општество од Западен Балкан и Источните земји, на тема “Зајакнување на одговорот на полицијата кон омразата врз етничка и верска основа“, Васил Стрејовски учествуваше на покана од Одделението за анти-дискриминација при Советот на Европа.

На семинарот стана збор за улогата на институциите за спроведување на законот во соработка со ранливите групи и малцинските заедници, во рамките на заедничките програми за борба против дискриминацијата на Европската Унија и Советот на Европа за земјите од Западен Балкан и Источните земји.

Исто така, се дискутираше за начините за справување со омразата и дискриминацијата врз етничките и религиозните малцинства, фокусирајќи се на стратегиите за спречување на злосторства од омраза; градење доверба меѓу полицијата и заедниците; собирање податоци за инциденти поврзани со омраза; како и добрите практики од различни земји од Европа.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.