Економија

Цените на нафтата нагло пораснаа поради судирите меѓу Израел и Иран

На светските берзи, цените на нафтата во петокот забележаа остар раст, откако ескалираа тензиите помеѓу Израел и Иран со серија меѓусебни напади.

Израелските воздушни удари врз ирански воени и нуклеарни постројки, проследени со ирански ракетен напад врз Тел Авив, предизвикаа вознемиреност кај инвеститорите и зголемени стравувања од понатамошна ескалација на конфликтот на Блискиот Исток.

Цената на американската лесна сурова нафта WTI скокна за 7,26 отсто, достигнувајќи речиси 73 долари за барел, додека европската нафта Брент порасна за 7 отсто, на приближно 74,23 долари за барел. Во текот на денот, цените во еден момент се зголемија дури за 14 отсто за WTI и 13 отсто за Брент – што претставува најголем дневен раст од март 2022 година, кога започна руската инвазија врз Украина.

Истовремено, ова е и најголем неделен пораст на цените на нафтата од октомври 2022 година.

Финансиските аналитичари предупредуваат дека пазарот е исклучително чувствителен на секоја нова информација од регионот. „Сѐ поголема е загриженоста околу можноста за ширење на конфликтот“, изјави Џим Рид, стратег во Deutsche Bank.

Доколку кризата продолжи, последиците би можеле да се почувствуваат и на глобалната економија. Стручњаците предупредуваат дека зголемувањето на цените на енергенсите може повторно да ја поттикне инфлацијата, особено во земјите кои се силно зависни од увоз на енергија.

Инвеститорите, централните банки и политичките лидери внимателно го следат развојот на ситуацијата, свесни дека секој нов ракетен напад може да значи дополнителен удар врз светската економија.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.

Економија

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит.

Малопродажната цена на ЕУРОДИЗЕЛ (Д-Е V) не се менува.

Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.

Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг.

Од 23.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 70,00 (денари/литар)

Моторен бензин ЕУРОСУПЕР БС – 98 72,00 (денари/литар)

Дизел гориво ЕУРОДИЗЕЛ БС (Д-Е V) 64,50 (денари/литар)

Масло за горење Екстра лесно 1 (ЕЛ-1) 63,50 (денари/литар)

Мазут М-1 НС 32,607 (денари/килограм)