Култура

Две награди за „Црно семе“ на Битолскиот театар на 59. МТФ „Војдан Чернодрински“ во Прилеп

На годинешното 59. издание на Македонскиот театарски фестивал „Војдан Чернодрински“ во Прилеп, НУ Народен театар Битола постигна значаен успех со претставата „Црно семе“, адаптација по романот на Ташко Георгиевски, во режија на Андреј Цветановски. Претставата беше добитник на две престижни награди:

Награда за современа сценска драматизација и адаптација, доделена на Јелена Цветановска;

Награда за главна машка улога, која ја освои актерот Мартин Мирчевски за улогата на Доне Совичанов.

Директорот на Битолскиот театар, Васко Мавровски, по повод признанијата изјави:

„Се гордеам што претставата посветена на македонската кауза ‘Црно семе’ освои две значајни награди на Македонскиот театарски фестивал ‘Војдан Чернодрински’. Честитам на сите колеги кои добија награда на фестивалот и посакувам уште многу успеси. Време е македонскиот театарски фестивал ‘Војдан Чернодрински’ повторно да биде македонски со големо ‘М’. Продолжуваме посветено да работиме на промоција на македонската драматургија, со македонски уметници – овие награди се само поттик да продолжиме по зацртаниот пат. Благодарност до целата екипа на претставата ‘Црно семе’ и целиот колектив на Битолскиот народен театар кои со својата посветеност кон претставата придонесоа да создадеме спектакл кој не се заборава.“

Покрај успехот на Битолскиот театар, уште едно признание отиде во рацете на битолчанец – сценографот Валентин Светозарев, кој ја доби наградата за најдобра сценографија за претставата „Рацин“, во продукција на НУ НТ „Јордан Хаџи-Константинов Џинот“ од Велес.

Светозарев со хумор ја прокоментира наградата:

„Мојата професија е архитект. Може никогаш не направив куќа со високи шимшир порти, ама по некоја сценографија направив.“

Во чест на добитниците, Театар Комедија ја изведе претставата „Вистината 2“, под режисерската палка на Владимир Јурц.
Покровители на фестивалот беа Министерството за култура и туризам и Општина Прилеп.

Култура

Голема загуба за Драмски театар Скопје – почина актерот Лазе Манасков

Со длабоко жалење, Драмски театар Скопје соопшти дека денеска почина нивниот актер и долгогодишен колега, Лазе Манасков.

Во чест на Манасков, вечерва ќе се одржи изведба на претставата „Куршуми над Бродвеј“, посветена на неговото творештво и придонес кон театарската сцена.

„Нека му е вечна слава“, стои во соопштението на театарот, изразувајќи почит и благодарност за неговиот ангажман и наследство во македонскиот театар.

Култура

80 години МНТ: Одбележани со премиера на монографија и театарски настап

Во фоајето на Македонскиот народен театар, се одржа свечена промоција на монографијата „Македонски народен театар 1945 – 2025 – Приказни поголеми од времето“, по повод 80 години од своето постоење. Монографијата е објавена со поддршка на Министерството за култура и туризам на Р. Македонија и претставува вистински поклон за сите кои ја ценат македонската театарска традиција и нејзината бесценета историја.

Ивана Јарчевска е главната уредничка на монографијата, а текстовите се дело на врвни автори и истражувачи: д-р Ана Стојаноска, Снежана Коневски-Руси, Загорка Поп-Антоска-Андовска, Бранко Ставрев, Емил Рубен, Игор Џамбазов, Лилјана Мазова, Братислав Димитров, Ѓорѓи Јолевски, Сашко Насев, Никола Ристановски, Дејан Дуковски, Звездана Ангеловска, Весна Петрушевска, Срѓан Јаниќијевиќ, Тања Кочовска, Синиша Евтимов, Искра Ветерова, Бојан Трифуновски, Сашко Коцев, Николина Кујача, Нела Витошевиќ, Сашка Димитровска, Нина Николиќ, Дарја Ризова, Драгана Костадиновска и Борче Начев.

Настанот привлече голем број уметници, театарски професионалци и љубители на сценската уметност, кои со восхит и почит ги проследија сведоштвата, документите и личните приказни што ги нуди ова издание. Меѓу присутните беше и министерот за култура и туризам, Зоран Љутков.

Култура

Филозофскиот факултет во Скопје празнува 105 години инспирација и образование

Големата сала на Македонската филхармонија денес ќе биде епицентар на македонската интелектуална историја. Со свечена академија, Филозофскиот факултет одбележува 105 години постоење — импозантен јубилеј на институцијата која ја постави темелната плоча на високото образование во земјава.

Пред присутните ќе се обратат клучните фигури на образовниот систем: министерката за образование и наука, Весна Јаневска, ректорката на УКИМ, проф. д-р Биљана Ангелова, како и деканот на факултетот-домаќин, проф. д-р Оливер Бакрески. Овој настан не е само прослава, туку и поклон пред традицијата на првата единица на скопскиот универзитет, која веќе повеќе од еден век е симбол на македонскиот стремеж кон знаење и наука.

Денешниот ден е резервиран за чествување на столбот на македонската едукација. Во срцето на Скопје, под сводовите на Македонската филхармонија, Филозофскиот факултет со свечена академија ќе ги одбележи своите 105 години. Како прв факултет во рамките на Универзитетот „Св. Кирил и Методиј“, тој останува живиот доказ за институционализацијата на македонската наука.

Говорницата ќе ја споделат министерката Весна Јаневска, ректорката проф. д-р Биљана Ангелова и деканот проф. д-р Оливер Бакрески, кои ќе се осврнат на значењето на овој факултет како лулка на интелектуалната елита низ децениите.