Балкан

Хрват ја откри вистинската слика за досегашната сезона: За сега не им оди добро

Летната туристичка сезона во Хрватска полека добива на интензитет, но веќе сега се забележуваат значителни промени во однесувањето и структурата на туристите. Иако оптимизмот во туристичкиот сектор е присутен, на теренот се забележува друга реалност – пораст на цените, поголеми гужви на патиштата и границите, но и намалена потрошувачка, особено во угостителскиот сектор.

На социјалните мрежи, особено на Reddit, се појавија искрени реакции од локалното население кое живее од туризмот. Коментарите откриваат дека бројот на гости не е драматично намален, но дека тие значително помалку трошат. Според еден корисник, клучниот проблем лежи во тоа што „старата гарда“ богати туристи, особено Италијанци, веќе со години не доаѓа, додека новите гости, претежно од пониската економска класа, се фокусираат на евтини опции и кратки престои.

„Кафулињата едвај го држат прометот од лани, рестораните се во пад. Ако некој преживува – тоа се оние што се префрлиле на евтино мени: пици, помфрит и ќебапи. Гостите едноставно не сакаат или не можат да плаќаат за риба, шкампи или паšticada“, коментира еден Далматинец. Според него, проблемот е и во слабата услуга, замрзната храна, како и недостиг на квалитетен кадар во кујните и меѓу келнерите.

Цените на сместувањето, горивото и патарините растат, а структурата на престој е сè пократка. Во градовите доминира т.н. „транзит туризам“ од два до три дена, додека само ретко кој останува подолго. Отците се претежно окупирани од сопственици на викендици, а внатрешноста привлекува семејства кои доаѓаат на поедноставен одмор.

И покрај тоа што сонцето и морето и понатаму ќе привлекуваат посетители, локалците предупредуваат: доколку не се понудат нови содржини и не се направи стратегија за задржување на туристите, Хрватска би можела да загуби дел од реномето како елитна летна дестинација.

Балкан

Камери со вештачка интелигенција ќе ги фаќаат сите сообраќајни прекршоци во Грција

Во само четири дена, новите сообраќајни камери со вештачка интелигенција во Атина забележаа над 2.000 сериозни прекршоци, откривајќи ја моќта на технологијата во борбата за безбедни патишта.

На авенијата Сингро, една од камерите регистрирала повеќе од 1.000 прекршоци, меѓу кои користење мобилен телефон додека се вози и неносење безбедносен појас, јавува „Катимерини“. Во исто време, речиси 800 возачи биле фатени како ја надминуваат брзината на дел од патот со ограничување од 90 километри на час, додека 480 случаи на поминување на црвено светло ја покажуваат сериозноста на проблемот.

Минатата недела на осум локации е започната пилот-програмата, со висок ризик по препорака на грчката полиција, која е дел од пошироката кампања на властите за зголемување на безбедноста на патиштата.

„Ова е политичка одлука со јасна социјална цел. Целта е намалување на сообраќајните несреќи и спасување животи“, изјави министерот за дигитално управување, Димитрис Папастергиу. Тој истакна дека акцијата не е само казнувачка, туку и предупредувачка: „Сакаме граѓаните да знаат дека правилата важат за сите и се спроведуваат на фер и современ начин.“

Камерите детектираат сериозни прекршоци како брзо возење, поминување на црвено, неносење појас, користење мобилен телефон при возење и нелегално користење на ленти за итни случаи. Возачите ќе бидат известени преку дигиталното поштенско сандаче на платформата gov.gr или преку електронска пошта, а жалбите ќе можат да се поднесуваат онлајн.

Властите веќе најавија планови за ширење на мрежата на 2.500 камери низ целата земја: 2.000 фиксирани на критични локации и 500 во јавниот превоз за контрола на автобуските ленти, со цел да се создаде „невидлива мрежа“ за безбедност на патиштата.

Балкан

За католички Божик и Нова година без блокади: Границата со Грција се отвора

По повеќе од три недели протести и блокади низ цела Грција, земјоделците најавија дека привремено ќе ги отворат граничните премини и патиштата. Престанокот на блокадите ќе важи во два периода: од вторник, 23 декември, до недела, 28 декември 2025 година, и од вторник, 30 декември, до недела, 4 јануари 2026 година.

Според грчките медиуми, овој потег е направен со цел туристите и граѓаните да можат непречено да ги реализираат своите планови за прослава на католичкиот Божиќ и Нова година во соседната земја.

Премиерот Кирјакос Мицотакис истовремено истакна дека голем дел од барањата на земјоделците веќе се исполнети. „Од листата со 27 побарувања, 16 се веќе задоволени или се разгледуваат позитивно. Четири се во процес на дискусија за да се најде решение, додека само седум не можат да се реализираат поради спротивност со европските регулативи или финансиска неизводливост“, објави Мицотакис на Фејсбук.

И покрај тоа, земјоделците не се откажуваат од својата борба. Протестите започнаа на 30 ноември со околу 60 блокади ширум земјата, вклучувајќи и клучни гранични премини.

Со оваа одлука, граѓаните конечно ќе можат да го поминат празничниот период без ограничувања, додека земјоделците продолжуваат да се борат за исполнување на своите незадоволни барања.

Балкан

Тензии во Нови Пазар: Државниот Универзитет отпушти 30 професори, студентите излегоа на протест поради таквата одлука

Вчера во Нови Пазар се одржа масовен студентски протест, откако Државниот универзитет донесе одлуки кои предизвикаа силни реакции кај академската и студентската јавност. Студентите излегоа на улица во знак на револт поради укинување на статусот редовен студент на околу 200 лица, како и отпуштање на 30 професори.

Според организаторите, отпуштените професори биле дел од академскиот кадар кој јавно го поддржувал студентското движење, кое започна по трагичниот пад на натстрешницата во Нови Сад.

Студентите оценуваат дека мерките на универзитетското раководство претставуваат притисок и обид за задушување на критичкиот глас во високото образование.
На протестот беа упатени барања за оставка на одговорните во управата на универзитетот, поништување на донесените одлуки и враќање на отпуштените професори, како и враќање на студентскиот статус на засегнатите студенти.

Протестот помина мирно, но со силни пораки дека студентите нема да се откажат од борбата за, како што велат, академска слобода, правда и солидарност. Организаторите најавија дека доколку не се исполнат нивните барања, протестите ќе продолжат и во наредниот период.