Република

Позитивни резултати и нови терапии за повредените од „Пулс“ – Кочанската болница со засилена грижа и инвестиции

Педесет и осум лица повредени во трагичниот пожар во дискотеката „Пулс“ во Кочани веќе носат компресивна облека, која, според лекарите, дава видливи резултати во третманот на лузните. Директорката на Општата болница во Кочани, д-р Катерина Папиќ-Мирчовска, информираше дека облеката се носи најмалку две години и овозможува пациенти да се движат и да посетуваат физикална терапија.

Дополнително, уште 14 пациенти се во процес на мерење за ваква опрема. Во болницата пристигнаа и нови специјални креми и 95 лепенки за третман на изгореници, со набавка што ќе се одвива според достапноста на пазарот.

Во пожарот загинаа 62 лица, а над 200 беа повредени. Десет пациенти и натаму се на лекување, половина во странски, а половина во македонски здравствени установи.

За забрзување на заздравувањето, веќе се применува и ПРП терапија – иновативен третман со плазма од сопствената крв на пациентот. Досега 19 лица се третирани од два различни медицински тима од Скопје. Сите идни пациенти ќе добијат повик со точен термин.

Во координација со Министерството за образование, се планира и поддршка за учениците жртви во трагедијата, со цел нивно редовно вклучување во наставата.

Портпаролката на Владата, Марија Митева, нагласи дека Владата инвестира системски во здравствениот сектор во Кочани. Во тек е целосна реконструкција на просторот за физикална медицина на 350 м², што вклучува нова електрична, водоводна и противпожарна мрежа, замена на прозорци, врати, подови и поставување на нова хидрантска инсталација.

Од утре започнува приемот на пациенти и во рехабилитацискиот центар на Пониква, каде што се направени подготовки и дезинфекција, поставени се комарници и обновени се спортските игралишта.

– Кочани добива системска грижа. Денес вложуваме во инфраструктурата, безбедноста и достапноста на здравствениот систем – истакна Митева, потенцирајќи дека грижата за повредените не престанува, туку се засилува.

Република

„Водовод“ Битола со инвестиции од 65 милиони денари во 2026: Фокус на стабилизација и намалување на загубите

Јавното претпријатие „Водовод“ Битола во 2026 година планира реализација на повеќе од 14 проекти, со вкупна вредност од околу 65 милиони денари, со цел зголемување на приходите и постепено намалување на финансиската загуба.

Директорот на претпријатието, Андреј Гинов, информира дека 2024 година „Водовод“ ја завршил со загуба од 61 милион денари. Вкупните приходи изнесувале 284 милиони денари, додека расходите достигнале 346 милиони денари. Од наплата на вода од правни и физички лица биле остварени 262 милиони денари, а од останати активности околу 22 милиони денари.

Најголем дел од расходите, како што појаснува Гинов, се однесуваат на електричната енергија, сирова вода и платите. Само за електрична енергија биле потрошени 43 милиони денари, за сирова вода кон хидро-системот „Стрежево“ 50 милиони денари, а за плати 148 милиони денари. Со вклучен ДДВ, овие три ставки достигнуваат околу 280 милиони денари, што е речиси целокупниот приход на претпријатието, и покрај високата наплата на сметки од околу 95 проценти.

Гинов направи споредба и со претходните години, нагласувајќи дека во 2021 година „Водовод“ имал 227 вработени со трошок за плати од 107 милиони денари, додека во 2024 година со 205 вработени, трошокот за плати изнесувал 148 милиони денари. Во 2025 година, поради зголемувањето на минималната плата, овој трошок се искачил на 158 милиони денари. Според него, во периодот од 2019 до 2025 година, бруто-платите се зголемиле за 62 милиони денари.

Како главни причини за загубата се посочуваат високата цена на електричната енергија, зголемените трошоци за сирова вода од „Стрежево“, како и поскапувањето на репроматеријалите. За надминување на овие предизвици, во 2025 година, во соработка со Општина Битола, биле изградени над 7 километри нова водоводна мрежа, во вредност од 40 милиони денари.

Во насока на намалување на трошоците, „Водовод“ изработил проект за поставување фотоволтаици и аплицирал со проект поддржан од Швајцарската амбасада, за инсталација на соларни панели на објектите во стопанскиот двор, со што значително ќе се намалат трошоците за електрична енергија.

Паралелно, подготвен е и проект за нов потисен цевковод, кој ќе овозможи зголемено испумпување вода од хидро-системот „Стрежево“ во летниот период. Со замената на постојниот цевковод Ф700 со нов Ф800, ќе се подобри притисокот на водата, ќе се намалат загубите и ќе се обезбеди стабилно водоснабдување на градот во наредните 50 години.

Минатата недела во Битола беше одржана и панел-дискусија посветена на подобрување на услугите што јавните претпријатија им ги нудат на граѓаните, на која беа отворени прашања за финансиската одржливост и ефикасноста на јавниот сектор.

Република

ГРАДОНАЧАЛНИКОТ КОЊАНОВСКИ НА СЕДНИЦА НА РЕГИОНАЛНАТА СТОПАНСКА КОМОРА

Градоначалникот на Општина Битола, Тони Коњановски денеска присуствуваше на 21-та свечена предновогодишна средба на Управниот одбор на Регионалната стопанска комора со седиште во Битола.

На дневен ред беше работата на Регионалната комора во 2025 година, како и предлог програмата за активностите во 2026 година.

Градоначалникот со своето присуство имаше можност да ги слушне предлозите и проектите кон побрз економски раст и развој на Пелагонија и Преспа за 2026 година.

Уште еднаш беше истакната важноста на долгогодишната соработка на Општина Битола со Регионалната стопанска комора, со цел побрз економски развој на регионот.

Република

Утре голем дел од Тетово и околината без електрична енергија

Голем дел од Тетово и неколку околни населени места утре (25 декември) ќе останат без електрична енергија поради планирани прекини во снабдувањето, информираат надлежните служби.

Според најавата, прекините ќе се реализираат во периодот од 06:00 до 07:00 часот, а ќе бидат опфатени повеќе локации во градот Тетово, како и населбите и селата Жилче, Гургурница, Озормиште, Селдарево, Сиричино, Требош и Шемшево.

Во Тетово, без струја ќе бидат делови од градот, вклучувајќи објекти во населбите Поток и Дреновец, околината на болницата, улиците Сандански и 29 Ноември, централното градско подрачје, Горна чаршија, кај Културниот дом, Гимназијата, Ленин, блок 70, како и објекти во близина на Комерцијална банка и Малиот хидроенергетски центар.

Од надлежната институција апелираат до граѓаните навремено да ги прилагодат своите активности и да имаат разбирање, посочувајќи дека прекините се неопходни заради одржување и подобрување на електроенергетската мрежа.