Македонија

Пуштен во употреба патот Гевгелија–Богданци: Нов пат за нови можности во Југоистокот

Со инвестиција од 5 милиони евра, обезбедени од буџетот на ЈП за државни патишта, денеска свечено беше пуштен во употреба новиот патен правец Гевгелија–Богданци, што се оценува како клучна инфраструктурна артерија за развој на целиот југоисточен регион.

Вицепремиерот и министер за транспорт и врски, Александар Николоски, на настанот нагласи дека новиот пат поврзува неколку општини и значајно ќе придонесе за унапредување на бизнис-секторот, полесна комуникација меѓу жителите и подобрување на квалитетот на живот во регионот.

„Овој пат значи многу за Богданци, Гевгелија, Валандово, Дојран и целиот регион. Го поврзува со Коридорот 10 и преку него со Грција, Србија и главниот град Скопје. Тоа значи побрз транспорт, развој на бизнисите, полесен пристап за студентите и побрз пласман на земјоделските производи“, рече Николоски.

Тој потенцираше дека проектот е еден од „заглавените“ што новата влада ги наследила, но дека со силна политичка волја и координација бил успешно довршен.

„Благодарност до премиерот за неговата поддршка – без него, овој проект немаше да биде можен. Благодарност и до работниците, ЈП за државни патишта, Министерството за транспорт и сите институции кои вложија труд“, додаде Николоски.

Новиот патен правец, како што нагласи, е дел од поширока визија за подобра инфраструктура во земјата, што ќе придонесе кон економски раст и подобра поврзаност на граѓаните.

Македонија

Згасна позната телевизија во Македонија – престана да емитува програма

Македонскиот телевизиски етер остана посиромашен за еден канал. Телевизија Сонце, која години наназад емитуваше програма со национална концесија преку кабелските оператори, престана со работа.

Гледачите кои се обидуваат да го најдат каналот сведочат за „црн екран“ или известување дека нема сигнал.

ТВ Сонце беше препознатлива по својата специфична програмска шема, фокусирана на македонската историја, културното наследство и прашањата поврзани со македонската дијаспора. Телевизијата беше основана од бизнисменот Ѓорѓија – Џорџ Атанасоски.

Останува непозната и судбината на вработените во овој медиум.

Македонија

Македонија и Турција ја зајакнуваат соработката во образованието и науката со нов договор

Македонија и Турција отвораат ново поглавје во билатералната соработка во образованието, науката, технологијата и иновациите. Министрите за образование и наука, Весна Јаневска и Јусуф Текин, потпишаа договор со кој се зајакнува партнерството меѓу двете земји и се создава основа за интензивна размена на знаење, искуства и кадар.

Со договорот се предвидува размена на информации и научни публикации во областа на формалното и неформалното образование, како и поттикнување на мобилноста на академици, образовни експерти, наставници и средношколци. Посебен акцент е ставен на средното, особено стручното образование, обуката и квалификациите на наставниот кадар, доживотното учење и реализацијата на заеднички образовни проекти.

Двете држави ќе разменуваат искуства и во примената на нови образовни технологии, како и во подготовката и унапредувањето на наставните планови и програми. Учениците ќе добијат можност да учествуваат на научни и културни натпревари што се организираат во Македонија и Турција, а ќе се поттикнува и развојот на заеднички образовни програми и збратимување на училишта.

Како дел од договорената соработка, во двете земји ќе се воведат изборни предмети „Јазикот и културата на Турците“, односно „Јазикот и културата на Македонците“, а предвидено е и меѓусебно стипендирање на средношколци.

За ефикасна примена на договорот ќе биде формирана заедничка работна група, која ќе го следи и координира спроведувањето на договорените активности.

Македонија

Неработни денови и продолжени викенди во јануари 2026

Празничната атмосфера продолжува и во првиот месец од новата година, а јануари носи неколку неработни денови кои овозможуваат подолг одмор и полесно планирање на работните обврски.

Новата година започнува со 1 јануари, кој е неработен ден и паѓа во четврток. Веќе во петок, на 2 јануари, следи кратко враќање на работа, по што доаѓа викенд пауза. Понеделник, 5 јануари, е работен ден, а потоа следуваат 6 и 7 јануари, кога се празнуваат Бадник и Божиќ, кои се неработни денови. На работа повторно се враќа на 8 јануари.

Јануари не завршува тука со празниците. На 19 јануари, понеделник, се празнува Богојавление – Водици, кој е неработен ден за граѓаните од православна вероисповед.

Дополнително, за припадниците на српската заедница, неработен ден е и 27 јануари, кога се одбележува празникот Свети Сава.

Со ваквиот распоред, јануари нуди неколку можности за продолжени викенди и кратки одмори, што многумина веќе ги користат за планирање на слободното време.