Балкан

Туристи на плажа на Јадранот снимиле призор што ќе го шокира регионот: „Ова стана зона на сумрак“

Иако летната сезона само што започна, јадранската обала веќе бележи вистински туристички бум. Туристите, особено од Србија, масовно се слеваат кон омилените дестинации како Грција и Црна Гора, при што Сутоморе повторно се наметнува како еден од најбараните избори. Но, сцените од преполнетите плажи предизвикаа шок и бурни реакции на социјалните мрежи.

Според сведочењата на туристи, уште во средината на јуни во Сутоморе „буквално нема каде да се пушти пешкир“. Плажите се пренатрупани и преку ден и во предвечерје, а некои ја опишуваат ситуацијата како „туристичка зона на сумракот“, со чувство на клаустрофобија и стрес.

Покрај гужвите, се жалат и на енормниот раст на цените. „Еспресо 3 евра, Кока-Кола 5 евра – двојно поскапо од Белград“, вели еден корисник на Фејсбук. Друг додава: „Се чувствувавме како боси по трње. Оваа година никако Сутоморе.“

Иако некои жалеа што го избрале ова место дури и во предсезона, други остануваат верни на Сутоморе, повикувајќи се на убавите спомени и традицијата. Но, сите се прашуваат едно – ако вака изгледа јуни, што ќе се случува во јули и август?

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.