Балкан

Грузијка уапсена за предизвикување пожар на грчкиот остров Хиос

Голем шумски пожар што избувна на грчкиот остров Хиос во неделата уништи околу 10.000 хектари грмушки и пасишта за само три дена, соопшти Министерството за климатски кризи и цивилна заштита на Грција.

Во врска со пожарот, грчките власти уапсија жена од Грузија, која според изјави на сведоци, била видена како фрла запалена цигара. Таа се соочува со обвинение за ненамерно предизвикување пожар. Случајот сè уште се истражува од страна на грчката противпожарна служба.

Иако пожарот е ставен под контрола, стотици пожарникари и натаму се на терен за да спречат евентуално повторно разгорување на огнените фронтови. Грција веќе неколку години се соочува со зголемена фреквенција и интензитет на шумски пожари, што властите го припишуваат на климатските промени.

Грчката влада досега исплати стотици милиони евра како надомест за домаќинствата и земјоделците погодени од екстремни временски услови, но и за модернизација на противпожарната опрема. За оваа летна сезона, бројот на пожарникари е зголемен на рекордни 18.000, а од 1 јули до 15 септември, дополнителна поддршка ќе пристигне од 294 пожарникари од пет европски земји.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.