Република

Коњановски и делегацијата од Турција ја зајакнуваат меѓународната соработка

Градоначалникот на општина Битола, Тони Коњановски, денес оствари средба со делегација од меѓупарламентарната група за пријателство Туркије – Македонија. Делегацијата ја предводеше амбасадорот на Република Туркије во Македонија, Н.Е. Фатих Улусој, а во составот беа и Бејџан Иљас, претседател на Пратеничката група за соработка со парламентот на Турција, како и Почесниот конзул на Турција во Битола, Ајдован Адемоски.

На средбата, градоначалникот Коњановски ги истакна успешните и добри односи што општина Битола ги гради со повеќе турски општини. Тој посочи дека соработката се развива и на економски и на културен план, што претставува основа за понатамошно зајакнување на билатералните врски.

Во текот на посетата, делегацијата ја посети и спомен собата на Мустафа Кемал Ататурк во Заводот и Музејот во Битола, како симбол на почит и историски врски меѓу двата народа.

Средбата ја потврди заложбата за продлабочување на пријателството и соработката меѓу општина Битола и турските партнери, со визија за уште поинтензивна размена во иднина.

Република

Трговските објекти на Широк Сокак во Битола ќе работаат во недела и празници

Битола, продолжува да ја зацврстува својата позиција како врвна туристичка дестинација, нудејќи им на посетителите незаборавно искуство низ вековната историја и автентичната архитектура.
Култното шеталиште Широк Сокак, со својот уникатен спој на староградски шарм и модерна енергија, останува главната точка на интерес за секој турист.

За да се овозможи целосно уживање во убавините на градот, Општина Битола во соработка со Министерството за култура и туризам, а согласно законската регулатива, воведува новини кои дополнително ќе ја зголемат неговата привлечност и функционалност.

Со цел да се одговори на потребите на бројните туристички групи кои го посетуваат градот за време на викендите и празниците, се овозможува непречена работа на трговските објекти во најфреквентните зони, дефинирани како туристичко-културолошка атракција.

Ова значи дека сите трговски објекти лоцирани на Широк Сокак сега ќе можат да ги услужуваат посетителите и во недела и за време на празници, нудејќи им можност за купување и на автентични сувенири во секое време.

Оваа потреба е поддржана со законските регулативи и известувањата од Министерството за култура и туризам, според кои Широк Сокак и Старата битолска чаршија се дефинирани како значајни туристичко-културолошки атракции. Како дел од заштитеното старо градско јадро, овие локации имаат статус на туристички места од висок ранг, што овозможува исклучоци во трговската дејност во корист на развојот на локалниот туризам.

„Битола не е само град на историјата, туку и град кој живее за своите гости. Со овозможувањето на работата во недела и празници на Широк Сокак, се создаваат услови за комплетно туристичко доживување кое доликува на еден модерен европски центар.“

Преку овие чекори, Општина Битола ја потврдува својата посветеност кон промоција на културното наследство и создавање на гостопримлива средина која ги привлекува туристите од целиот свет, правејќи го секој престој во градот исполнет и содржаен.

Република

Градоначалникот Проданоски ја донесе празничната радост во детските градинки во Прилеп

Во пресрет на новогодишните празници, градоначалникот на Прилеп, Дејан Проданоски, ги посети најмалите жители на детските градинки „Наша иднина“.

Тој им подари новогодишни пакетчиња и заедно со децата се забавуваше, споделувајќи радост, насмевки и празнично расположение.

„Детските насмевки се најубавиот украс на овие празнични денови и потсетник зошто грижата за најмладите е секогаш на прво место“, истакна Проданоски.

Република

Македонскиот пасош на светската листа: рангиран 41-ви меѓу најмоќните во светот

Македонскиот пасош бележи напредок на светската сцена и оваа година се искачи повисоко на ранг-листата на најмоќни пасоши во светот, објавена од реномираната консултантска куќа „Хенли и партнерс“. Со позиција број 41, Македонија ја подобрува својата ланска позиција, кога се најде на 45-то место, што претставува јасен сигнал за зголемена меѓународна мобилност на македонските граѓани.

Според рангирањето, носителите на македонски пасош можат да патуваат без виза во вкупно 129 држави и територии ширум светот. Иако ова не е рекордната позиција за земјата – најдобриот пласман беше забележан во 2014 година, кога пасошот се најде на 36-то место – сегашниот скок сепак се оценува како позитивен тренд.

Во регионот, Хрватска убедливо води како сопственик на најмоќниот пасош на Балканот, со безвизен пристап до дури 184 дестинации, што ја вбројува и меѓу најдобрите во светот. Србија е позиционирана на 35-то место со 137 дестинации, додека Црна Гора е веднаш зад Македонија, на 42-ро место, со 128 земји без виза. Албанија и Босна и Херцеговина се наоѓаат во долниот дел од регионалната листа, со пристап до околу 120 дестинации, а Косово останува најслабо рангирано во регионот, на 63-то место.

На самиот врв на глобалната листа доминираат азиските земји – Сингапур го држи првото место со рекордни 193 дестинации без виза, по што следуваат Јужна Кореја и Јапонија. Високо се позиционирани и најголемите европски држави, како Франција, Германија, Италија, Шпанија и Швајцарија, чии пасоши им овозможуваат на граѓаните речиси неограничена слобода на движење.

Рангирањето на „Хенли и партнерс“ уште еднаш покажува дека силата на пасошот не е само симболична, туку директно влијае врз можностите за патување, бизнис и меѓународна соработка.