Балкан

Фотографија од српски туристи на плажа во Полихроно го налути цел Балкан: “Вака не е ниту во Индија и Пакистан” [ФОТО]

Една фотографија направена на плажа во грчкото летувалиште Полихроно предизвика бурни реакции на социјалните мрежи.

Станува збор за слика на која се гледаат делови од плажата претходно обележани со пешкири, оставени уште од вечерта, со цел следниот ден да се „резервира“ место под сонцето – без плаќање лежалки. Овој чин, според дел од интернет-корисниците, е „срамен“ и „примитивен“, додека други го бранат, повикувајќи се на поскапувањето и високите цени што ги наметнуваат самите локали.

„Не е Индија, не е Пакистан… ова се српски туристи во Полихроно, лето 2025. Грците навистина претеруваат со цените – 10, 15, па и 20 евра за лежалка, плус задолжителна консумација, но ова со пешкирите е дното. Можеби ќе бидам осуден, но немам зборови…“, стои во една од објавите на групата Live from Greece на „Фејсбук“.

Следуваа стотици коментари, од кои некои остро ја осудуваат оваа појава, додека други ја поддржуваат како начин за одмор без непотребни трошоци.

„Пријателе, ако можеш секој ден да плаќаш 30–40 евра за лежалка, тоа не ти дава право да ги навредуваш оние кои не можат. Јас сум туристички водич со 15 години искуство и можам да кажам дека убавината на плажата е во едноставноста: пешкир на песокот, чадор, овошје и насмевка. Не во скапи коктели и ексклузивни лежалки. Ако сакаш луксуз – појди на Малдиви. Овде луѓето сакаат само да одморат“, гласи еден од најпопуларните коментари.

Други пак го поставуваат прашањето од правен и етички аспект – дали е прифатливо делови од јавна плажа да се „приватизираат“ преку ноќ со пешкири и чадори.

„Проблемот не се пешкирите, туку тоа што се оставаат преку ноќ и се заземаат делови од јавен простор. Тоа не е ред. Некогаш сите се сончавме така, но тогаш не ги окупиравме плажите како наша сопственост“, напиша друг корисник.

Темата останува отворена, а според реакциите, јасно е дека прашањето за летен одмор, цени и почитување на јавниот простор сè уште силно ги поларизира туристите.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.