Свет

Фатени ирански шпиони во Германија

Дански државјанин од авганистанско потекло, 53-годишниот Али С., е осомничен дека за потребите на една странска разузнавачка служба шпионирал јеврејски објекти во Германија, соопшти Главното државно обвинителство во Карлсруе. Според обвинението, Али С. на почетокот од годинава добил задача од иранската тајна служба да ги следи движењата околу јеврејските објекти во Берлин и да бележи детали од секојдневието на истакнати личности од јеврејската заедница во Германија.

Меѓу лицата кои биле следени, според германските медиуми, е и претседателот на Јеврејската заедница во Германија, Јозеф Шустер. Налогот за активностите, како што се наведува, дошол од „Ал Кудс Бригадите“, дел од Иранската револуционерна гарда задолжен за активности во странство. Али С. престојувал во Берлин во јуни, но во тоа време веќе бил под надзор на германските тајни служби.

Германските медиуми јавуваат дека информациите за активностите на Али С. дојдоа од „една странска разузнавачка служба“, при што се шпекулира дека станува збор за израелскиот Мосад. Германското министерство за надворешни работи повикало иранскиот амбасадор во Берлин на информативен разговор и му доставило протестна нота поради иранските активности.

Иран го демантираше било какво учество во случајот и ги оцени обвиненијата како „неосновани и опасни“, додавајќи дека овие обвинувања се дел од кампања поврзана со конфликтот меѓу Иран и Израел. Германскиот министер за надворешни работи, Јохан Вадефул, истакна дека заштитата на јеврејскиот живот во Германија е „висок приоритет“.

Јеврејските објекти во Германија веќе неколкупати биле цел на ирански тајни служби, а во 2017 година беше спречен напад врз социјалдемократскиот политичар Рајнхард Робе, тогаш претседател на Германско-израелското друштво.

Од почетокот на војната меѓу Израел и Иран, германските власти ја засилија безбедноста околу јеврејските објекти, особено по нападите на Хамас врз Израел во октомври 2023 година. Во исто време, во Германија драматично се зголемил бројот на злосторства со антисемитска позадина.

Свет

Хаос на европските аеродроми по воведувањето на новиот Шенген систем

Воведувањето на Шенген системот за влез и излез (EES) на 12 октомври 2025 година предизвика сериозни проблеми на аеродромите во Европа, при што патниците во периоди на зголемена фреквенција чекаат и до три часа за да поминат гранични контроли, соопшти Европскиот оддел на Меѓународниот совет на аеродроми (ACI).

Оттаму велат дека прогресивното снимање на биометриски податоци и регистрација на државјани од трети земји ја зголемуваат обработката на патниците до 70%, а недостигот на киосци и полициски кадар дополнително ја усложнува ситуацијата. Најзасегнати се аеродромите во Франција, Германија, Грција, Исланд, Италија, Португалија и Шпанија.

ACI повикува Европската комисија, eu-LISA, Фронтекс и земјите-членки итно да преземат мерки или да овозможат поголема флексибилност во примена на системот до целосното воведување. Генералниот директор на ACI EUROPE, Оливие Јанковец, предупредува дека доколку проблемите не се решат пред зголемувањето на прагот за регистрација на 35% од 9 јануари, хаосот на аеродромите ќе се продлабочи, со сериозни последици по безбедноста и оперативноста.

Свет

Украински дронови предизвикаа штета на руската нафтена инфраструктура во Таман

Украински беспилотни летала го погодиле руското пристаниште Таман во Црното Море, при што биле оштетени две пристаништа, еден цевковод за снабдување со мазут и два танкера, соопшти регионалната администрација на Краснодарската област. На едниот танкер избувнал пожар кој веќе е изгаснат, а два резервоари за складирање биле оштетени од падот на остатоци од дрон.

Службите за цивилна заштита информираат дека екипажите на погодените бродови се евакуирани, а пожарите се целосно изгаснати. Пристаништето Таман се смета за клучна точка за испорака на нафта и течен природен гас.

Украина зачестено ги напаѓа руските нафтени и енергетски објекти како дел од својата одбрана од руската инвазија.

Свет

Пентагон алармира: Кина тајно распоредила над 100 нуклеарни ракети – можно воено сценарио за Тајван до 2027

Најнов извештај на Пентагон, сè уште необјавен, открива дека Кина значително го забрзува својот нуклеарен капацитет и не покажува интерес за преговори за контрола на оружјето. Според американските разузнавачи, Пекинг тајно распоредил повеќе од 100 интерконтинентални балистички ракети од типот ДФ-31 во „полиња со силоси“ во близина на границата со Монголија, што им овозможува брзо лансирање во случај на конфликт.

Американскиот претседател Доналд Трамп претходно најави план за денуклеаризација во соработка со Кина и Русија, но извештајот на Пентагон укажува дека Пекинг не покажува сериозен интерес за такви мерки или разговори за контрола на вооружувањето.

Според документот, кинескиот нуклеарен арсенал сè уште брои под 600 боеви глави, но експанзијата продолжува, а до 2030 година се очекува бројката да надмине 1.000. Пентагон истакнува дека клучната година е 2027, кога Кина се проценува дека ќе биде способна да води и да победи во потенцијален конфликт за Тајван.

Стратегијата на Пекинг вклучува удари на далечина од 1.500 до 2.000 наутички милји од кинескиот брег, со што би можело сериозно да се попречи американското воено присуство во Азиско-пацифичкиот регион. Кина засега го застапува ставот дека се придржува до „нуклеарна стратегија на самоодбрана“ и политика на ненапаѓање, додека Пентагон предупредува на зголемената закана за стабилноста во регионот.