Германија започна жестока офанзива против т.н. „руска флота во сенка“ која тргува со нафта низ Балтичкото Море, заобиколувајќи ги меѓународните санкции. Од денес, танкерите се под засилени контроли – особено нивните осигурувања во случај на истекување и еколошки катастрофи, соопштија заеднички германските министерства за сообраќај и надворешни работи.

Министерот за надворешни работи Јохан Вадепфул изјави дека целта е јасна: „Вршиме притисок врз руската флота во сенка и го штитиме Балтичкото Море.“

Покрај Германија, и Шведска започна да ги проверува овие сомнителни бродови, за кои се верува дека избегнуваат западни пристаништа и пловат без соодветно осигурување. Дел од нив се стари танкери кои користат ризични методи на транспорт, а се поврзуваат и со неодамнешни инциденти со оштетување на подводни кабли.

„Штом ја добиеме целосната слика за состојбата на овие бродови, ќе можеме веднаш да преземеме мерки и санкции“, рече германскиот министер за сообраќај Патрик Шнајдер.

Балтикот станува новото стратешко бојно поле во енергетската војна со Русија.