Свет

Нов скандал и расправија помеѓу Маск и претседателот Трамп: “Без субвенциите ќе се вратеше во Јужна Африка”

Маск и Трамп во отворен судир поради законот за трошоци

Илон Маск објави серија пораки на социјалните мрежи во кои остро го нападна законот за даноци и трошоци што го поддржува Доналд Трамп, заканувајќи им се на конгресмени кои ќе гласаат за него со финансирање на предизборни кампањи против нив.

„Секој што водеше кампања за намалување на трошоците, а гласаше за најголемото зголемување на долгот во историјата, треба да ја спушти главата од срам“, напиша Маск на „X“. Тој додаде дека ќе се погрижи тие да ги загубат прелиминарните избори, ако „тоа е последното нешто што ќе го направи на Земјата“.

Маск го нападна и она што го нарече „демократско-републиканска унипартија“, најавувајќи дека, доколку законот биде усвоен, ќе формира нова политичка партија наречена „Американска партија“. Според него, САД се претвориле во „еднопартиска држава – ПОРКИ ПИГ ПАРТИЈА“.

Како одговор, Трамп го обвини Маск дека неговите успеси се должат на државни субвенции. „Без нив, ќе мораше да ја затвори продавницата и да се врати во Јужна Африка“, напиша Трамп на „Truth Social“. Тој потсети дека Маск знаел уште од порано дека Трамп се спротивставува на задолжителното користење електрични возила.

Овој отворен судир ескалираше во време кога во Сенатот се расправа за контроверзниот закон, кој е дел од предизборната програма на Трамп. Законот, меѓу другото, предвидува зголемување на горната граница на долгот, што Маск и други фискални конзервативци го критикуваат како недоволен во борбата против растечките трошоци.

Според проценките на непартиската Канцеларија за буџет при Конгресот, предлог-законот ќе го зголеми буџетскиот дефицит за 3,3 трилиони долари во следната деценија.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.