Балкан

Пожар во близина на Атина го загрозува главниот град, илјадници евакуирани од Крит

Грчките противпожарни служби водат тешка битка со два големи пожара – еден на островот Крит, каде што се опожарени шуми и маслинови насади, и нов пожар кој избувна во атинското предградие Пикерми, непосредно близу до главниот град и меѓународниот аеродром. Над 1.000 лица се евакуирани од Крит, додека властите издадоа наредби за евакуација на три населени места во областа околу Атина.

Силен ветер и екстремно суви временски услови ја отежнуваат борбата со огнената стихија, која ја истакнува ранливоста на Грција во сè почестите летни пожари. Во Пикерми, густи облаци од чад го прекрија небото, а беше затворена и главната сообраќајница кон Атина.

Во Иерапетра, југоисточниот дел на Крит, пожарот опожари домови и хотели. На терен се распоредени над 230 пожарникари, 46 возила и 10 хеликоптери. Евакуирани се повеќе од 1.000 граѓани и туристи, од кои некои привремено се сместени на стадион или во хотели на северниот дел од островот. Регистрирани се и неколку хоспитализирани лица поради проблеми со дишењето.

Според хотелските асоцијации, од регионот се евакуирани околу 5.000 туристи, што предизвикува загриженост за летната туристичка сезона на Крит.

Истовремено, во западна Турција се води борба со шумски пожари во областите Чешме и Одемиш, каде илјадници лица се повлекоа од своите домови. Италија издаде црвени метео-аларми за 18 градови поради температури до 38°C, а Швајцарија привремено ја затвори нуклеарната централа „Безнау“ поради покачени температури на реките.

Пожарите што го зафатија Медитеранот уште еднаш потврдуваат дека регионот е „жешка точка“ на климатската криза – феномен што добива на интензитет со секоја наредна година.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.