Балкан

Ова се последните фотографии кои ги направил туристот кој беше убиен од мечка [ФОТО]

Италијански турист загина во Романија во напад од мечка

Туристот од Италија, Омар Фаранг Зин (48), вчера загина во напад на мечка во Романија. Трагичниот инцидент се случил додека Зин возел мотор по патот Трансфагарашан, во близина на браната Видрару во округот Аргеș.

Ден пред несреќата, Зин на својот Facebook профил објавил повеќе фотографии и видеа од мечки кои ги сретнал покрај патот, вклучително и селфи со мечка.

Се претпоставува дека Зин се приближил до мечка мајка со три младенчиња за да ги фотографира, што го предизвикало нападот.

По анализа на фотографиите од неговиот мобилен телефон, е потврдено дека тој слегол од моторот и се обидел од многу мала дистанца да ги сними мечката и нејзините младенчиња – постапка која се смета за исклучително ризична.

Мечката најпрвин го повредила мотористот, а потоа го одвлекла околу 60 метри надолу по стрмнината. Интервенирале жандармеријата и планинската спасувачка служба од Аргеș, а според локалните медиуми, мечката на крај била убиена.

На телото на жртвата биле пронајдени повеќе рани од каснувања. Екипите успеале да го извлечат телото од тешко пристапниот терен и го пренеле во судска медицина за обдукција и утврдување на точната причина за смртта. На местото на нападот биле пронајдени траги од крв, делови од опрема и ракавици на жртвата.

Локалниот портал alba24.ro известува дека посебна комисија ја идентификувала мечката и донела одлука за нејзино отстранување.

Во истата област, кон крајот на мај, во два одделни инциденти, мечки повредиле и еден Полјак и една Шпанка.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.