Спорт

Откриена причината за пропаднатиот трансфер на Нико Вилијамс во Барселона

Трансферот на крилниот напаѓач на Атлетик Билбао, Нико Вилијамс, во Барселона не се реализираше поради несогласување околу клаузула што ја бараше фудбалерот. Според информациите на шпанскиот клуб, 22-годишниот репрезентативец инсистирал во договорот да биде вклучена клаузула што ќе му овозможи да замине доколку клубот не успее навреме да го регистрира за натпреварување.

Иако личните услови веќе биле усно договорени, преговорите пропаднале кога претставниците на Вилијамс побарале гаранции дека Барселона ќе го регистрира играчот најдоцна до 20 август, веднаш по првото коло од новата сезона во Ла Лига. Според нив, интерес за Вилијамс покажале и други европски клубови, меѓу кои Баерн Минхен и Арсенал, кои биле подготвени да понудат посигурни услови.

Спортскиот директор на Барселона, Деко, одбил да се согласи со поставениот услов. Тој уверувал дека Вилијамс ќе биде регистриран до крајот на преодниот рок, но одбил да вклучи клаузула која би го овозможила раскинот на договорот доколку тоа не се случи.

Како резултат на тоа, Нико Вилијамс го продолжи договорот со Атлетик Билбао до 2035 година, а Барселона, разочарана од пресвртот, нема намера да продолжи со обидите за негов ангажман.

Спорт

Македонија стана полноправна членка на Медитеранската ракометна конфедерација

Македонската ракометна федерација (РФМ) денеска објави дека нашата земја е примена како полноправна членка на Медитеранската ракометна конфедерација. Досега Македонија имаше статус на придружна членка.

Одлуката беше донесена на седмиот конгрес на Медитеранската конфедерација, кој се одржа во рамките на изборниот конгрес на Меѓународната ракометна федерација во Каиро, Египет.

Следната година македонските ракометарки и ракометари ќе имаат активна улога на меѓународната сцена. Пионерките ќе учествуваат на Медитеранскиот шампионат во февруари во Приштина, додека кадетите ќе настапат во април во Словачка. Сениорите ќе се борат за медалите на Медитеранските игри во август во италијанскиот град Таранто.

Спорт

Омерагиќ: Посетата на Мамадов отвора нова фаза за македонскиот фудбал

Во „Куќа на фудбалот“ се одржа средба меѓу раководството на Фудбалската федерација на Македонија и Елкан Мамадов, директор за асоцијации и развој во ФИФА и еден од најблиските соработници на претседателот Џани Инфантино.

Претседателот на ФФМ, Масар Омерагиќ, истакна дека посетата на Мамадов претставува силна потврда за одличната соработка со ФИФА и континуираната поддршка што федерацијата ја добива во реализацијата на стратешките цели, со посебен акцент на инфраструктурата и зајакнувањето на националните селекции.

Омерагиќ најави дека веќе се договара и посета на претседателот на ФИФА, Џани Инфантино, во првата половина на 2026 година, што дополнително ќе ја зацврсти соработката и ќе отвори нови можности за развој на македонскиот фудбал.

Тој нагласи дека ФФМ останува целосно посветена на принципите што се од клучно значење за ФИФА – транспарентност, одговорност и долгорочен развој на фудбалот на сите нивоа во Македонија.

Спорт

ФФМ и Масар Омерагиќ со честитка до Шкендија за европскиот успех

Фудбалската федерација на Македонија и нејзиниот претседател Масар Омерaгиќ упатија честитки до фудбалскиот клуб Шкендија за изборениот пласман во елиминациската фаза од УЕФА Лигата на конференции.

Од ФФМ оценуваат дека остварениот успех е резултат на професионален пристап, изразен тимски дух и јасна амбиција за докажување на меѓународната сцена. Воедно, пласманот на Шкендија се посочува како значаен придонес за промоција на македонскиот клупски фудбал во европските натпреварувања.

„Успехот на Шкендија е потврда за квалитетната работа на клубот и неговото претставување надвор од границите на државата“, се наведува во честитката од Фудбалската федерација.
ФФМ им посака на фудбалерите и на стручниот штаб на Шкендија успешни и квалитетни настапи во продолжението од европската кампања, со надеж дека клубот ќе продолжи достојно да ја претставува Македонија на меѓународната фудбалска сцена.