Република

Асфалтиран дел од улицата „Нико Фундали“ во Битола – реконструкција на патната и подземната инфраструктура

Во Битола денеска беше извршено асфалтирање на дел од улицата „Нико Фундали“, како дел од сеопфатен проект за реконструкција на коловозот, водоводната и мешовитата канализациона мрежа. Проектот опфаќа вкупна должина од 340,70 метри.

Реконструкцијата вклучува целосна обнова на коловозната конструкција, како и на тротоарите, кои се изведени со нови префабрикувани павер елементи. Покрај површинските зафати, целосно се заменети и дотраените подземни инсталации.

Во делот на водоводната мрежа, старите азбест-цементни и ПВЦ цевки се заменети со нови полиетиленски (PE) цевки, додека канализационата мрежа е реконструирана со поставување на нови коругирани полиетиленски цевки (PE) со класа SN8 и внатрешен дијаметар од 300 мм.

Проектот чини вкупно 12.628.225 денари, од кои 7.506.051 денари се наменети за коловозот, 2.443.398 денари за водоводната мрежа и 2.678.776 денари за мешовитата канализација.

Општина Битола продолжува со реализација на вакви инфраструктурни проекти, со цел подобрување на условите за живот и подигнување на квалитетот на урбаната средина.

Република

Шестоседот на Попова Шапка од денес повторно во функција

Жичницата шестосед на Ски центарот Попова Шапка од 26 декември, ќе биде отворена за прошетки и скијачки активности, соопштија од центарот. Сепак, за целосно уживање на ски-патеките се очекуваат свежи снежни врнежи кои ќе го овозможат официјалното отворање на зимската сезона.

„Со подобрување на условите, планираме официјално отворање на зимската сезона и со нетрпение очекуваме да ве пречекаме за сезона исполнета со спорт, забава и незаборавни искуства“, велат од Ски центарот Попова Шапка.

Климатските услови засега остануваат стабилни, но скијачката заедница со нетрпение ја очекува првата сериозна снежна покривка.

Република

Тоневски: Ново кошаркарско игралиште за учениците во Злетово

Заврши асфалтирањето на кошаркарското игралиште во подрачното основно училиште „Кирил и Методиј“ во Злетово. Со овој зафат е создадена основата за целосно уредување на спортскиот простор кој ќе биде наменет за учениците и младите од населбата.

По стабилизирање на временските услови, предвидено е поставување мултифункционална спортска подлога, нови кошеви, клупи за одмор, како и уредување на пристапни патеки до теренот.

Проектот е финансиран од страна на ООУ „Браќа Миладиновци“, во соработка со Општина Пробиштип.

Градоначалникот Тони Тоневски истакна дека вложувањата во спортската инфраструктура се директна инвестиција во здравјето и правилниот развој на децата, нагласувајќи дека општината ќе продолжи со поддршка на вакви проекти во сите населени места.

Република

Повеќе села во тетовско утре ќе останат без електрична енергија

Поради планирани интервенции на електродистрибутивната мрежа, утре (26 декември) без струја ќе останат делови од повеќе села во тетовскиот регион.

Според најавата, прекинот е планиран во периодот од 09:00 до 14:00 часот во селото Желино, и тоа објектите од центарот кон Горната џамија. Во истиот временски интервал без електрична енергија ќе бидат и делови од селото Гајре, особено објектите во близина на џамијата.

Во селото Ново Село (Желино) прекинот ќе трае од 09:00 до 14:30 часот и ќе ги опфати објектите на влезот во селото, кај училиштето, како и објектите кон горниот дел од селото.

Исто така, од 09:00 до 14:30 часот без струја ќе бидат и делови од селото Групчин, додека во селото Цепчиште прекинот е најавен од 09:00 до 14:00 часот.

Надлежните служби апелираат до граѓаните навремено да ги прилагодат своите обврски и да имаат разбирање додека траат планираните работи на мрежата.