Балкан

Ал Џезира Балканс го прекина емитувањето – последните вести од Сараево

Телевизискиот канал „Ал Џезира Балканс“ денеска престана со емитување, а последното издание на вестите беше прикажано напладне од централното студио во Сараево. Водителот на крајот од емисијата накратко потврди дека тоа е последната вест од АЈБ.

На социјалните мрежи, бројни новинари и вработени емотивно се збогуваа со колегите и публиката, потврдувајќи го затворањето на каналот кој беше препознатлив по регионалниот пристап, сериозниот новинарски тон и поврзаноста со глобалната мрежа на „Ал Џезира Медиа Нетворк“.

Ал Џезира Балканс започна со работа во септември 2010 година, кога катарскиот медиумски концерн ја презеде локалната телевизија НТВ Студио 99. Редовното емитување започна на 11 ноември 2011 година, а веб-порталот беше лансиран истиот ден.

Со студио во Сараево и регионални центри во Скопје, Белград, Загреб и Подгорица, АЈБ беше првиот ТВ-канал на Балканот кој емитуваше исклучиво на босански, српски и хрватски јазик во рамки на интернационална новинарска мрежа.

Во 2018 година го основа и сопствениот фестивал на документарен филм, кој секоја година се одржуваше во Сараево, носејќи авторски продукции од целиот свет.

Иако затворањето е јавно потврдено преку вработените, „Ал Џезира Балканс“ сè уште официјално не ги соопшти причините за прекинот на програмата.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.