Општина Делчево упати апел до граѓаните, како и до правните и физичките лица, активно да пријавуваат случаи на загадување на амбиенталниот воздух со цел подобра заштита на животната средина и јавното здравје. Од општината потсетуваат дека согласно законските прописи е строго забрането користење на гуми, стиропор, пластика, текстил, отпадни масла и друг вид отпад како огревен материјал, бидејќи при нивно согорување се ослободуваат токсични материи кои сериозно го загадуваат воздухот.

Во таа насока, општинските инспекциски служби најавија вонредни инспекциски контроли, особено во инсталациите каде се регистрираат зголемени емисии на штетни честички. При утврдување неправилности ќе се преземаат соодветни казнени мерки, во согласност со важечката законска регулатива.

Од Општина Делчево информираат дека според Законот за животна средина, сите инсталации се обврзани да поседуваат елаборати за заштита на животната средина, во кои е прецизно утврдено кое огревно средство смее да се користи. Дополнително, строго е забрането текстилните фабрики да издаваат отпаден текстил на физички лица.

Граѓаните можат да пријават загадување на воздухот преку Архивата на Општина Делчево на ул. „Светозар Марковиќ“ бр. 1, преку формата „Пријави проблем“ достапна на општинската веб-страница, на е-поштата info@delcevo.gov.mk, директно до инспекторот за заштита на животната средина, како и преку другите електронски канали на општината.

Општина Делчево информира и дека преку проектот „Спречување на загадувањето на воздухот со помош на едукативни технички решенија“ е набавена нова станица за мониторинг на PM10 честичките. Преку линк достапен на општинската веб-страница, граѓаните имаат можност во реално време да го следат квалитетот на воздухот во Делчево.

Прилеп е целосно подготвен да го пречека најубавиот период од годината, украсен со љубов и внимание, најави Дејан Проданоски. Градот веќе влегува во празнична атмосфера што ги обединува граѓаните и потсетува на вредностите на заедништвото и радоста.

Во деновите што следуваат, Прилеп ќе биде град на светлина, музика и бројни содржини за сите генерации, со настани исполнети со забава и изненадувања. Прилепската празнична приказна и Новогодишниот базар, како што истакна Проданоски, носат нова енергија и топлина во градското јадро.

„Прилеп го добива она што го заслужува – празници со душа, радост за сите генерации и најубавата празнична приказна во Македонија“, порача Проданоски, нагласувајќи дека ова е приказна што ќе се пишува и ќе се слави заедно.

Посебен белег на празничната програма ќе биде и специјалната песна посветена на Прилеп, која симболично ќе ја заокружи празничната магија и ќе ја истакне љубовта кон градот.

Видеото може да го погледнете тука

Министерот за внатрешни работи Панче Тошковски истакна дека системот „Безбеден град“ ќе се спроведува со прецизно дефиниран праг на толеранција, со цел зголемување на безбедноста во сообраќајот и јавниот простор, а не казнување по секоја цена.

Тошковски нагласи дека системот ќе биде насочен кон препознавање и санкционирање на сериозни и опасни прекршоци, особено оние кои директно го загрозуваат животот и безбедноста на граѓаните. Според него, целта е да се воспостави ред и превенција, а не репресија без разум.

„Ќе има јасни правила, транспарентност и точно утврдени критериуми. Граѓаните ќе знаат што се санкционира и зошто. Системот нема да биде лов на прекршители, туку алатка за заштита на човечки животи“, потенцираше министерот.

Проектот „Безбеден град“ предвидува користење на современи технолошки решенија, камери и софтвер за следење на сообраќајот, со што ќе се подобри контролата и ќе се намали бројот на сообраќајни несреќи.

Министерството најави дека имплементацијата ќе оди фазно, со претходна информираност на јавноста и соодветен период за прилагодување, со цел граѓаните навремено да се запознаат со новиот систем и неговото функционирање