Свет

Шекеринска: „Ако ѝ помагаме на Украина, инвестираме во сопствената безбедност“

Заменичката генерален секретар на НАТО, Радмила Шекеринска, од Дубровник испрати јасна порака дека земјите членки на НАТО мора правично да го делат товарот кога станува збор за одбранбените трошоци, со цел сојузот да остане силен, обединет и подготвен да одврати било каква агресија.

„Самитот на НАТО беше историски. Го зајакна и трансформираше сојузот. Целта ни беше да создадеме пофер систем за споделување на обврските, но и поефикасен механизам за одвраќање закани. Сите 32 сојузници се согласија дека Русија и тероризмот остануваат најголемите закани за евроатлантската безбедност“, истакна Шекеринска во разговор за ХРТ.

Таа нагласи дека вложувањето во безбедноста на Украина директно е поврзано со безбедноста на сите членки на НАТО. „Некои го нарекоа тоа првата линија на одбрана. Ако ја поддржуваме Украина, инвестираме во нашата безбедност“, рече таа.

НАТО-земјите се согласија на амбициозна цел – издвојување од 5% од одбранбениот буџет за модернизација, набавка на вооружување, обука на војските и развој на стратегија. „Не е доволно само да имаме пари. Мора да покажеме дека сме способни да дејствуваме“, додаде Шекеринска.

Во однос на воената помош за Украина, таа истакна дека сојузниците веќе ја надминале лани ветената поддршка, обезбедувајќи повеќе од 50 милијарди евра. Воената поддршка од САД, според неа, е клучна, но и другите земји ја зголемуваат својата улога. „Таа помош не е симболична – таа ја зајакнува и нашата индустрија, нашата одбрана, нашата иднина“, нагласи Шекеринска.

На прашањето за можните мировни преговори, таа одговори: „Јасно е дека Русија не е заинтересирана за примирје. Ги поддржуваме сите дипломатски иницијативи, но додека траат нападите врз цивили и инфраструктура, мора да продолжиме со поддршката на Украина“.

Шекеринска заклучи дека НАТО, со новите одлуки, покажал единство и решителност: „Трансатлантското единство не се само зборови. Тоа бара конкретни дела, обврски и споделена одговорност“.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.