Свет

Франција предупредува: Дали на Балканот му се заканува голема војна?

Франција предупредува: Можно е голем воен судир во Европа до 2030 – Русија потенцијално би ги таргетирала Молдавија, Балканот или земја членка на НАТО

Француските власти во најновиот „Национален стратешки преглед за 2025 година“ предупредуваат дека до крајот на деценијата постои реална закана од избивање голем конфликт во Европа, во кој би можеле да бидат вклучени Франција и нејзините европски сојузници.

Во документот, кој го пренесува рускиот портал Спутник, се укажува на зачестените референци кон руската закана – зборовите „Русија“, „руски“ и „Москва“ се споменати повеќе од 80 пати. Според анализата, потенцијална агресија од страна на Русија би можела да се случи во период од три до пет години.

Потенцијални цели – Молдавија, Балканот, па дури и земја членка на НАТО

Француските безбедносни структури разгледуваат сценарија според кои Русија би можела да преземе офанзивни чекори кон Молдавија, региони од Балканот или дури и кон некоја од државите членки на НАТО.

„Станува јасно дека навлегуваме во нова епоха на засилени безбедносни ризици и можност од војна со висок интензитет надвор од националната територија – конкретно во Европа – каде што би можеле да бидат вклучени Франција и нејзините сојузници до 2030 година. Во исто време, нашата територија би можела да биде изложена на интензивни хибридни напади“, се наведува во документот.

Русија: НАТО ја претвора Молдавија во фронт против Москва

Реакцијата од Москва не изостана. Според соопштението на Прес-бирото на Руската надворешна разузнавачка служба (СВР), Алијансата активно се подготвува да ја вклучи Молдавија во потенцијален вооружен судир со Русија.

„Според информациите со кои располага СВР, НАТО работи на трансформација на Молдавија во своја база на источниот фронт, со цел брзо распоредување на трупи блиску до руската граница, во случај на ескалација“, соопштува агенцијата РИА Новости.

Овие информации се совпаѓаат со загриженоста што ја изразуваат европските безбедносни служби за можно проширување на конфликтот надвор од границите на Украина, во поширокиот источноевропски регион.

Свет

Германија воведува задолжителна воена обврска, казни до 1.000 евра за непослушните

Од јануари 2026 година, Германија официјално ќе започне со примена на нов модел на задолжителна воена обврска, со кој се предвидуваат и строги санкции за оние што ќе ја игнорираат процедурата. Сите мажи од одредена возрасна група ќе добиваат прашалници од Бундесвер, а одбивањето да се одговори или доставувањето неточни податоци ќе биде санкционирано.

Германското Министерство за одбрана соопшти дека процесот ќе започне со испраќање на околу 54.000 прашалници месечно. Според новите правила, непочитувањето на оваа обврска може да резултира со парична казна до 1.000 евра, па дури и со принудна регрутација.

Планот, кој го иницира министерот за одбрана Борис Писториус, предвидува постепено зајакнување на армиските капацитети. Од јули 2027 година, задолжителен ќе стане и лекарскиот преглед за сите мажи, а непојавувањето на прегледот може да доведе и до полициско приведување.

Целта на новиот модел е до 2035 година бројот на припадници на германската армија да достигне 270.000 војници, како дел од пошироките напори за јакнење на одбранбените капацитети на земјата.

Свет

Русија изврши еден од најжестоките напади врз Украина пред Божиќ

Повеќе од 600 беспилотни летала и околу 30 проектили ја погодија украинската престолнина Киев и енергетската инфраструктура низ земјата, при што загинаа најмалку три лица, меѓу кои и дете. Станува збор за еден од најмасовните руски напади во последните месеци.

Украинскиот претседател Володимир Зеленски изјави дека нападите извршени непосредно пред Божиќ јасно покажуваат кои се приоритетите на Москва. Тој предупреди дека Русија подготвува нов бран удари по празниците, оценувајќи дека таквото однесување е „нормално за Русија“. Според него, ситуацијата дополнително се усложнува поради недостигот од системи за воздушна одбрана.

Воздушната тревога била активна во речиси цела Украина, а Министерството за енергетика воведе вонредни рестрикции во неколку региони. Во Киев, делови од градот останале без електрична енергија поради погодената инфраструктура.

Полска соопшти дека подигнала борбени авиони за заштита на својот воздушен простор, поради зголемените безбедносни ризици во регионот.

Украина Божиќ го слави на 25 декември според новиот календар, иако дел од населението сè уште го одбележува празникот и на 7 јануари, како и во Русија.

Во вечерното обраќање, Зеленски најави враќање на украинската делегација од Мајами, каде што се одржале мировни разговори со американскиот специјален претставник Стив Виткоф. Разговорите ги оцени како конструктивни, но без конкретен напредок.

Во меѓувреме, украинските сили извршиле напад врз голема нафтена постројка во Ставропол, управувана од рускиот енергетски гигант Лукоил.

Свет

Зеленски предупредува: Русија подготвува масивни напади по Божик

Претседателот на Украина, Володимир Зеленски, предупреди дека Русија би можела да започне интензивни напади за време на Божиќ. Во обраќање пред дипломатите во Киев, тој оцени дека е „сосема нормално“ Кремљ да се обиде да изврши масивни напади токму за празникот, нагласувајќи дека Украина се соочува со тешка ситуација поради недостиг на системи за воздушна одбрана.

Иако Украина официјално го слави Божиќ на 25 декември, многу граѓани го почитуваат православниот календар и го слават празникот на 7 јануари, исто како и во Русија.

Зеленски исто така објави дека украинската делегација, која учествуваше на преговори во Мајами со американскиот специјален претставник Стив Виткоф, се очекува денеска да се врати во Украина. Виткоф оцени дека разговорите со украинската и руската делегација биле „конструктивни“, без да навлезе во детали за постигнати договори.