Министерот за здравство Азир Алиу информираше дека во Министерството пристигнале 90 пријави за неправилности во здравствените установи, доставени преку дигиталната алатка за пријавување на официјалната веб-страница. Од нив, досега се обработени 60 пријави, но само две се со индикации за понатамошна постапка.

– Од сите градови има пријави, најмногу од Скопје, но и од другите градови по една или две. Ќе постапуваме по сите случаи додека не се утврди дали има основ за понатамошни дејствија – изјави Алиу.

Министерот потсети и на важните измени во Законот за здравствена заштита, со кои, како што рече, создавањето семејство станува достапно право, а не луксуз. Бројот на поддржани обиди за ин витро оплодување е зголемен од три на шест, а целата постапка е дигитализирана и скратена на само две недели.

– Нема повеќе месеци чекање, нема изгубени документи. Имаме нов пристап – надеж и едноставност – нагласи министерот.

Тој исто така информираше дека е поедноставен процесот за лекување во странство, воведени се појасни одговорности во управувањето со Фондот за здравство и започна усогласување на правата на странските граѓани со тие на домашните пациенти.

Министерството за здравство веќе ја започна националната програма за менаџирање на кризи и отпорност на здравствениот систем. Програмата предвидува стандардизирани протоколи, дигитална платформа за координација во реално време, симулациски вежби и обуки за интероперативна комуникација меѓу здравствените и безбедносните институции.

Алиу најави и нова инвестициона фаза вредна 205 милиони евра за реконструкција и унапредување на здравствената инфраструктура во Штип, Тетово и Кичево.