Република

Димитровски: Градиме спортска сала што ќе ја заслужи Битола – со план, визија и посветеност

Секретарот на Општина Битола, Борче Димитровски, остро реагираше на блокадите и, како што вели, манипулациите поврзани со изградбата на новиот спортски комплекс, долгогодишно ветување за жителите на градот.

Според него, уште од 2013 година овој проект се ветува на избори, но реални чекори започнале дури по 2021 година. „Битола е град на спортот и заслужува модерен спортски комплекс, а не празни ветувања и политички игри,“ истакна Димитровски.

Тој ги посочи клучните чекори што се направени од 2021 година наваму:
• Во 2021 година проектот е официјално вклучен во развојните планови на Општина Битола, со едногласна поддршка од Советот.
• Во 2022 е распишан конкурс за идејно решение, кое подоцна е избрано и претставено пред јавноста.
• Во 2023 година, по анализа на постојните урбанистички планови, се идентификува нова локација – државно земјиште во реонскиот центар „Запад“, со капацитет да го прими комплексот.
• Започната е постапка за нов ДУП за Нова Битола, со кој покрај спортски комплекс се предвидуваат градинка, училиште, старски дом, паркови и станбен дел.
• Во јуни 2025 година, нацрт-планот стигнува до Советот на Општината, но не се усвојува поради недостиг од поддршка, што ја закочува постапката.

„Ако најголем грев на оваа локална власт е тоа што предложи реална, издржана локација за спортски комплекс, тогаш прашањето е зошто дел од советниците од СДСМ и Поинаку го блокираат планот? Дали станува збор за инает или за заштита на приватни интереси?“ прашува Димитровски.

Тој најави дека постапката за избор на изработувач на основен проект е во завршна фаза и ќе биде објавена наскоро. „Не можеме да дозволиме Битола да остане без спортска сала поради лични или политички калкулации. На лагата ѝ се кратки нозете – а граѓаните знаат кој работи за нив, а кој за туѓи интереси,“ рече тој.

На крајот, Димитровски порача:
„Битола сака сала. Битола заслужува нова сала. Нека ни е вечна Битола!“

Република

Три децении пријателство: Македонија слави 30 години дипломатски врски со 14 земји

Во свечена атмосфера во Министерството за надворешни работи и надворешна трговија, денес беа одбележани три децении од воспоставувањето на дипломатските односи на Република Македонија со 14 земји, меѓу кои Соединетите Американски Држави, Грција, Австралија, Саудиска Арабија, Романија, Молдавија, Индија, Естонија, Украина, Казахстан, Монголија, Азербејџан, Литванија и Израел.

Свои обраќања на настанот имаа заменик-министерот за надворешни работи и надворешна трговија, Зоран Димитровски, како и амбасадорката на Романија, Адела Моника Аксинте.

Во своето обраќање, заменик министерот Димитровски истакна дека денес се слави „триесетгодишно патување на просперитет и взаемно почитување“ кое започнало во 1995 година. „Во тие рани години на нашата независност, секое воспоставување на дипломатски односи беше вистински камен-темелник во градењето на нашата државност. Тие први чекори го одбележаа нашиот непоколеблив пат кон западноевропските вредности и нашите аспирации за интеграција во евроатлантското семејство“, нагласи Димитровски.

Свечениот настан беше прилика да се потсети на значењето на долгорочната соработка и пријателството меѓу Република Македонија и земјите партнери, како и на заедничките вредности кои ги градат меѓусебните односи во изминатите три децении.

Република

Битола во празничен ритам: започнува најголемиот зимски фестивал во државата

Прочитајте ги секојдневните програмски содржини на фотографиите или разгледајте ја Програмата на „Зимска приказна“ на следниот линк:
https://www.bitola.gov.mk/zimska-prikazna-25-26/

Од 20 декември до 5 јануари, не пропуштајте да бидете дел од „Зимска приказна“.

Многу музика, детска програма, кино на отворено, возот „Мечо“, празничниот автобус и уште многу други содржини за сите генерации.

Годинава, бројките ја потврдуваат приказната:
-над 200 часа програма низ целиот град
-од нив, околу 35 часа детска програма
-67 бендови
-повеќе од 20 соло изведувачи
-5 фолклорни друштва
-2 градинки и 11 училишта како активен дел од програмата

Ова е најголемиот зимски фестивал во Македонија веќе неколку години.
Ова е декемврискиот ритам на Битола.

Република

ВЛЕН: Волјата на граѓаните ќе се потврди на изборите во Гостивар и Врапчиште

Коалицијата ВЛЕН најави силен настап на претстојните локални избори што ќе се одржат на 11 јануари, со јасна стратегија и поддршка за кандидати кои, како што велат од коалицијата, ја претставуваат волјата на граѓаните.

Во Општина Гостивар, ВЛЕН ќе настапи со реден број 1 на гласачкото ливче, предводена од кандидатот за градоначалник Невзат Бејта. Во Врапчиште, пак, коалицијата ја поддржува независната кандидатура на Зулхајрат Демири, кој се наоѓа под реден број 5.

Од ВЛЕН посочуваат дека симболиката на броевите 1 и 5 е во духот на слоганот „Еден глас“, кој ја отсликува нивната политика заснована на одлуки што произлегуваат директно од граѓаните.

Коалицијата потсетува дека веќе остварила победа во 10 општини, што, според нив, претставува јасен сигнал дека албанските гласачи ја отфрлиле, како што ја нарекуваат, политичката манипулација позната како „референдум“. ВЛЕН оценува дека ова е доказ за промената што ја бараат граѓаните и за слабеењето на политичките структури кои, според нив, денес формално опстојуваат само во Гостивар и Врапчиште.

„11 јануари е датум кога оваа волја повторно ќе се потврди“, порачуваат од коалицијата, повикувајќи ги граѓаните на Гостивар и Врапчиште да се обединат и да гласаат – број 1 во Гостивар и број 5 во Врапчиште – за, како што наведуваат, победа и власт што работи во интерес на народот.