Црна Хроника

Нова драма во судењето на Штекли

Почетокот на судскиот процес против Раде Трајковски – Штекли и уште девет лица обвинети за организирана трговија со дрога е одложен за 7 август, откако обвинетиот Трајковски утринава бил хоспитализиран поради сериозни здравствени проблеми.

Судијата Илија Трпков информираше дека Трајковски бил неконтактибилен и дезориентиран, при што била повикана итна медицинска помош и тој требало веднаш да биде префрлен во Клиничкиот центар. Исти симптоми, според судијата, обвинетиот ги имал и претходниот ден.

Иако рочиштето првично беше одложено за по 11 часот, од затворот информирале дека Трајковски сè уште не бил пренесен во болница поради чекање на асистенција од Министерството за внатрешни работи. „Судот не може да чека цел ден обвинетиот да биде однесен на лекар. Судењето се одложува за 7 август“, изјави судијата Трпков.

По одложувањето, обвинителката Верица Бержецка Крстева соопшти дека Штекли во меѓувреме доставил психијатриско мислење во кое се наведува дека не е ментално способен да ги следи судските постапки. Јавното обвинителство ќе побара дополнително психијатриско вештачење и подготвително рочиште за соочување на мислењата.

Станува збор за предмет што го води Обвинителството за гонење организиран криминал и корупција, кое поднесе обвинение против вкупно 10 лица, осомничени за трговија со дрога, главно во скопската населба Аеродром. Според обвинителниот акт, групата била високо организирана, со прецизна распределба на улогите – од набавка до улична продажба на кокаин и марихуана.

Дрогата се чувала во изнајмени станови, а се продавала по цена од 4.500 до 6.000 денари за грам кокаин и од 200 до 300 денари за грам марихуана. Комуникацијата меѓу членовите се одвивала преку апликацијата Снепчет, а клучни докази биле обезбедени преку системот за анализа на телефони „Селебрити“, донација од САД.

Истрагата траеше речиси една година и вклучуваше посебни истражни мерки. Првично беа опфатени 16 лица, но седум од нив склучија спогодби со обвинителството и добија затворски казни од три до три и пол години.

Црна Хроника

Уапсени лихвари – Полицијата со детали

Кривична пријава против двајца кавадарчани за сторено кривично дело “лихварство”

ОВР Неготино, до Основното јавно обвинителство Кавадарци, поднесе кривична пријава против Н.С.(59) и Р.С.(34), двајцата од Кавадарци, поради постоење основи на сомнение дека сториле кривично дело „лихварство“ по член 260 од Кривичниот законик. Според пријавнеото, тие во периодот од јуни 2023 до ноември 2025 година на лице од Неготино му давале пари на заем со писмени и усни договори, а за себе договарале несразмерна имотна корист во вкупна вредност од 167.000 денари. за што оштетениот доставил и докази. Со наредба од Основен суд Кавадарци извршен е претрес во нивниот дом и помошни простории, при што се пронајдени и одземени мобилни телефони, а од Н.С. се одземени тефтери со забелешки, по што двајцата се лишени од слобода.

Црна Хроника

Кривична пријава за поранешен градоначалник – МВР со детали

Кривична пријава за „несовесно работење во службата“ и „злоупотреба на службената положба и овластување“ против поранешниот градоначалник на Струмица и двајца вработени во општината

СВР Струмица, до Основното јавно обвинителство Струмица, поднесе кривична пријава против К.К.(35) и Б.Ш.(64), двајцата од Струмица, поради постоење основи на сомнение дека сториле кривично дело „несовесно работење во службата“ и против И.Г.(54) од Струмица поради постоење основи на сомнение дека сторила кривично дело „злоупотреба на службената положба и овластување“.
Пријавената И.Г., во својство на раководител на Одделението за администратирање на приходи при општина Струмица, постапувајќи спротивно на одредбите од Законот за даноците на имот, во четири наврати ги пречекорила своите овластувања со тоа што изготвила решенија за даночно ослободување од данокот на промет на недвижен имот при продажба на станови од станбена куќа со наменска класификација А1. Ваквото ослободување од плаќање било направено повикувајќи се на член 25 од Законот за даноците на имот, меѓутоа одредбите за таквото даночно ослободување се однесувале само за станбени згради и станови кои согласно класата на намени се со номенклатура А2.1, но не и за станбени куќи со номенклатура А1.1, за кои и биле изготвени решенијата. Исто така, И.Г. во три од четирите решенија, во отсуство на пријавениот Б.Ш., се потпишала и во полето Потврдил-контролирал.
Пријавениот Б.Ш., во својство на Раководител на Секторот за финансиски прашања при општина Струмица и пријавениот К.К., во својство на градоначалник на општина Струмица, постапиле несовесно при вршењето на своите службени овластувања и пропуштиле должен надзор при постапувањето по тие предмети и ги потпишале изготвените решенија за даночно ослободување изготвени од И.Г.. Со ваквите дејствија пријавените лица го оштетиле буџетот на општина Струмица за износ од 668.388 денари.

Црна Хроника

77-годишна жена жртва на измама – изгубила 8.000 евра!

Лишен од слобода измамник од охридско, измамил жена од струшко за сума од 8.000 евра

На 17.12.2025 во 11.40 часот во Струга, полициски службеници од Надворешната канцеларија за криминалистички работи Струга го лишија од слобода Н.С.(40) од с.Горно Лакочереј, охридско.
Тој се сомничи дека на 11.12.2025 измамил 77-годишна жена од струшко село за сума од 8.000 евра. Според пријавеното, на 11.12.2025 тој телефонски ја побарал жената, лажно се претставил и ѝ рекол дека нејзината ќерка прегазила дете на пешачки премин и дека ќе треба да плати за да ја пуштат, односно да ја ослободат од наводно обвинение. Откако се договориле жената му ги дала парите и тој заминал.
По преземени мерки и активности во соработка со Одделот за криминалистичка полиција-Сектор за општ и насилен криминал, тој е пронајден и лишен од слобода, а по целосно документирање на случајот, против него е поднесена кривична пријава поради постоење основи на сомнение за сторено кривично дело “измама”.