Свет

Абу Обеида: Ако Израел се повлече, Хамас нема повторно да понуди договор за заложници

Портпаролот на вооруженото крило на Хамас, Абу Обеида, во видео-обраќање испратено до медиумите по четири месеци тишина, изјави дека движењето нема повторно да понуди нов предлог за делумен договор за размена на заложници доколку Израел се повлече од тековните преговори.

„Не ветуваме дека повторно ќе понудиме нацрт-договор и предлог за ослободување на десет затвореници, доколку Израел ги напушти разговорите што сега се водат“, порача Обеида во снимката, во која директно го обвини израелскиот премиер Бенјамин Нетанјаху за одбивање на сѐопфатната понуда за размена на сите заложници, која Хамас ја доставил во последните недели.

Од израелска страна, висок функционер за Тајмс оф Израел изјави дека токму Хамас го одолговлекува процесот на преговори, што моментално се одвиваат во Доха.

„Израел е подготвен да ги доведе преговорите со Хамас до крај, но постојаното одбивање и одолговлекување будат сомнежи во нивната сериозност,“ рече официјалниот претставник, додавајќи дека Хамас верува оти времето игра во нивна корист.

Сепак, според него, тековните воени операции на Израелската одбранбена сила (ИДФ) во Газа ја потврдуваат спротивното – дека токму Израел го користи времето за да создаде теренски предности и притисок врз палестинската страна.

Преговорите за прекин на огнот и размена на заложници продолжуваат во услови на висока напнатост и меѓусебни обвинувања, додека хуманитарната состојба во Појасот Газа и натаму се влошува.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.