Британскиот премиер Кир Стармер изјави дека Коалицијата на подготвени држави разгледува опции за испраќање копнени трупи во Украина, во рамки на поширока стратегија за поддршка и притисок врз Русија.

На заедничка прес-конференција со германскиот канцелар Фридрих Мерц во Лондон, Стармер потврди дека „воените планови веќе се разработени и се подготвени за акција, вклучително и копнени и поморски операции“.

„Првиот приоритет е Путин да се доведе на преговарачка маса и да се обезбеди безусловен прекин на огнот“, рече Стармер, додавајќи дека санкциите остануваат клучен инструмент за притисок.

Тој нагласи дека е важно планирањето да не се одложува додека не започне примирје, бидејќи командната структура е веќе воспоставена.

Британскиот премиер истакна и дека безбедноста на Европа започнува во Украина, најавувајќи дека Велика Британија и Германија, во соработка со САД и другите сојузници, работат на испорака на нов пакет воена помош.

Стармер и Мерц потпишаа и историски билатерален договор – Кенсингтонскиот договор – кој предвидува засилена соработка меѓу Лондон и Берлин во одбраната, индустријата, науката и справувањето со илегалните миграции.

Канцеларот Мерц изрази жалење за Брегзит, но нагласи дека европското единство е од клучно значење пред „руската закана која ја поткопува европската безбедносна архитектура“.